Petropavlda sottalǵan áıelder úshin beınetaksofon júıesi iske qosyldy

PETROPAVL. KAZINFORM - Petropavl qalasyndaǵy №50 túzeý mekemesinde jazasyn óteýshi áıelderge beınetaksofon júıesi engizildi.

Joba Memleket basshysy Qasym-Jomart Toqaevtyń osy jyldyń 14 naýryzynda Quryltaıda bergen tapsyrmasyn oryndaý aıasynda jáne «Zań men Tártip» tujyrymdamasyn iske asyrý sheńberinde júzege asyryldy.

Bas prokýratýra málimetinshe, bastama eń aldymen, kámeletke tolmaǵan balalary bar analarǵa jaǵdaı jasaýdy kózdeı otyryp, qamaýdaǵy azamatshalardyń turmys jaǵdaıyn izgilendirýge baǵyttalǵan.

Jańa júıe arqyly sottalǵan áıelder jaqyndarymen beıneqońyraý arqyly sóılese alady. Árbirine jeke ID-kod berilgen, baılanys tek jeke isinde tirkelgen telefon nómirlerine habarlasýǵa múmkindik beredi. Týystary Google Play arqyly «Soilephone» qosymshasyn júktep alyp, baılanys aqysyn ózderi tóleı alady.

Beıneqońyraýdan bólek, aýdıo jáne beınehabarlama, SMS almasý qyzmeti qoljetimdi.

Barlyq aqparat qorǵalǵan serverde saqtalady, bul derbes málimetterdiń senimdi qorǵalýyn qamtamasyz etedi.

Júıeni engizý kelesideı nátıjelerge qoljetkizýge múmkindik beredi:

- sottalǵandardyń kúızelis deńgeıin tómendetý;

- otbasylyq baılanystardy saqtaý jáne nyǵaıtý;

- zańǵa baǵynýǵa yntalandyrýdy arttyrý;

- áıelderdiń bostandyqqa shyqqannan keıingi qoǵamǵa beıimdelýine yqpal etý.

Joba oblys prokýratýrasynyń, Qylmystyq-atqarý júıesi departamentiniń jáne «Jas Tarlan» JShS-niń qatysýymen iske asyrylyp jatyr.

Aıta keteıik, SQO-da bıyl 122 sottalǵannyń jazasy qatańdatyldy.

SQO-da sottalǵandar kásipkerlik negizin meńgerip, qarjylyq saýatyn arttyrady.