Petropavlda sottalǵan 5 adamnyń asqazanynan uıaly telefon tabyldy

PETROPAVL. QazAqparat – Soltústik Qazaqstan oblysy boıynsha qylmystyq-atqarý júıesi departamentiniń ES-164/3 mekemesiniń aýmaǵyna uıaly telefon ótkizbek bolǵandar anyqtaldy, dep habarlaıdy QazAqparat tilshisi.

SQO boıynsha QAJD baspasóz qyzmetiniń málimetinshe, 20 naýryz kúni ES-164/3 mekemesiniń qyzmetkerleri sottalǵandardy tintý barysynda 5 jazasyn óteýshiden 6 uıaly telefon tapty. Olar tyıym salynǵan baılanys quraldaryn jutyp, túrmege asqazandarynda ótkizbek bolǵan.

«Bul sottalǵandar bizdiń mekememizge jaza merzimin óteý úshin basqa óńirlerden keldi. Olardy qabyldaý kezinde túzeý mekemelerinde tyıym salynǵan zattardy tabý maqsatynda tolyq tintý jáne jeke zattaryna tekserý júrgizildi. Tyıym salynǵan zattardy alyp kirýge jáne saqtaýǵa áreket jasaǵany úshin qylmystyq-atqarý zańnamasynda tártiptik jaýapkershilik kózdelgen», - deıdi SQO boıynsha QAJD ES-164/3 mekemesiniń bastyǵy Rýstan Ahmetjanov.

Túzetý mekemesiniń qyzmetkerleri sottalǵandardyń zańsyz áreketin tolyq tintý kezinde metall detektordiń kómegimen anyqtady. 5 sottalǵannyń asqazanynan kólemi 6,5*2,5 sm bolatyn «Nokia» markaly 5 uıaly telefon, dál sondaı kólemdi «Samsung Duos» markaly 1 uıaly telefon, «Activ» abonentiniń 1 sım-kartasy jáne «Altel» abonentiniń 2 sım-kartasy bolǵan.

Mekeme qyzmetkerleri jedel-tergeý tobyn shaqyryp, atalǵan fakti aqparatty esepke alý kitabynda tirkeldi.