Petropavlda sotta jalǵan aıǵaq bergen kelinshek sottaldy
PETROPAVL. KAZINFORM – Kórineý jalǵan aıǵaq bergen áıelge bes jylǵa bas bostandyǵynan aıyrý jazasy kesildi.
Alaıda «Qazaqstan Respýblıkasynyń jańa Konstıtýtsııasynyń qabyldanýyna baılanysty raqymshylyq jasaý týraly» zańǵa sáıkes raqymshylyqqa ilinip, jazasy 3 jyl 4 aıǵa qysqartyldy. Sottalǵan jazasyn shartty túrde óteıdi.
Sot úkimimen probatsııalyq baqylaý belgilengen kelinshekke turaqty turǵylyqty jerin, jumysyn nemese oqý ornyn probatsııa qyzmetine habarlamaı ózgertýge, alkogol ishiletin oıyn-saýyq oryndaryna barýǵa, bos ýaqytynda turǵylyqty jerinen shyǵýǵa, sondaı-aq probatsııa organyna habarlamaı basqa eldi mekenderge ketýge tyıym salyndy.
Ol probatsııa qyzmetine tirkelip, profılaktıkalyq áńgimelesýlerge qatysýǵa mindetti. Eger turaqty jumysy nemese oqýy bolmasa, bir aı ishinde jumyspen qamtý máseleleri jónindegi jergilikti organǵa jumyssyz retinde tirkelýi tıis.
Sonymen qatar sottalǵan áıelden jábirlenýshilerdiń ótemaqy qoryna 20 AEK mólsherinde, ıaǵnı 78 640 teńge májbúrli tólem óndirildi.
Byltyr Petropavldaǵy páterlerdiń birinde tórt adam áıeldi kúshpen ustap, olardyń ekeýi oǵan qatysty zorlyq áreketin jasaǵan. Osydan keıin jábirlenýshi polıtsııaǵa shaǵymdanyp, qylmystyq is sotqa deıin jetken. Alaıda sot talqylaýy barysynda áıel buǵan deıin bergen aıǵaqtarynan bas tartqan. Tergeý jáne sot barysynda onyń kórineý jalǵan aıǵaq bergeni anyqtalǵan. Sottalýshy óz kinásin tolyq moıyndap, jasaǵan áreketine ókinetinin jetkizdi.
Buǵan deıin Mańǵystaýda 13 jastaǵy balanyń ólimine qatysty qylmystyq is sotqa joldanǵanyn jazǵan edik.
