Petropavlda sot zańsyz boı kótergen kópqabatty úıdi tolyq buzýǵa sheshim shyǵardy

PETROPAVL. KAZINFORM — Petropavlda salynyp jatqan turǵyn úı kesheniniń qurylysy ruqsat qujattarsyz zańsyz júrgizilgen.

Soltústik Qazaqstan oblysynyń mamandandyrylǵan aýdanaralyq ekonomıkalyq soty isti qarady. SQO memlekettik sáýlet-qurylys baqylaý jáne lıtsenzııalaý basqarmasy Nazarbaev kóshesi, 329A ýchaskesinde turǵyzylyp jatqan nysandy buzýdy talap etti. 

Basqarmanyń málimetinshe, jeke kásipker A.Bespalov syrtqy ınjenerlik jelilersiz jáne jobalaý-smetalyq qujattamasyz qurylysty júrgizgen. Tehnıkalyq jáne avtorlyq qadaǵalaý bolmaǵan. Tıisti organdy qurylys-montajdaý jumystaryn júrgizýdi bastaǵany týraly eskertpegen. 

Sondaı-aq kórshi úıdiń turǵyndary shaǵymdanyp, qurylystyń tym jaqyn júrgizilip, ara qashyqtyqtyń 20 metrge jetpeıtinin aıtqan. 

Tekserý kezinde ǵımarattyń 1–2 qabaty turǵyzylyp qoıǵany belgili boldy. Bul faktiler boıynsha kásipker Ákimshilik kodekstiń birneshe baby boıynsha jaýapqa tartylyp, aıyppuldardy tólegen.

Keıin tıisti organ qurylysty toqtatqanyna qaramastan, nysanda jumystyń jalǵasyp, qazandaǵy qaıta tekseris kezinde úıdiń 4–5 qabatqa deıin kóterilgeni tirkeldi. Osy derek boıynsha taǵy bir ákimshilik hattama toltyryldy.

Kásipker óz kezeginde bastapqyda jiberilgen zańbuzýshylyqtar tek aıyppul salýdy kózdeıtinin, al tolyq buzý zańda qarastyrylmaǵanyn aıtty. Onyń sózinshe, ol barlyq tıisti qujattardy keshiktirip bolsyn ázirlegen.

Sot keıin jasalǵan qujattar bastapqy zańbuzýshylyqty joımaıdy dep tanydy. Nátıjesinde A.Bespalov óz qarajatyna kommertsııalyq úı-jaı men parkıngi bar kóppáterli turǵyn úı keshenin tolyq buzýǵa mindetteldi. 

Buǵan deıin Almatyda jyl basynan beri 33 zańsyz qurylys nysany buzylǵanyn jazǵan edik.