Petropavlda sorǵy stantsııasyn jóndeýge arnalǵan qarajatty jymqyrǵan basshy jazasyn aldy
ASTANA. KAZINFORM — «Petropavl qalasynyń turǵyn úı qyzmeti» JShS dırektory jáne bas ınjeneri 8 mln teńgeden astam memlekettik aqshany ıemdengen, dep habarlaıdy Soltústik Qazaqstan oblysy prokýratýrasynyń baspasóz qyzmeti.
2025 jylǵy 3 shildede Petropavl qalalyq sotynda memlekettik qarajatty urlaý týraly shýly is boıynsha kezekti úkim shyǵaryldy.
— Dırektory «K» men bas ınjener «T» qyzmettik jaǵdaıyn paıdalana otyryp, iri mólsherde bıýdjet qarajatyn ıemdengeni úshin kináli dep tanylyp, «K» 3 jylǵa, «T» 2 jylǵa bas bostandyǵynan aıyryldy. Memlekettik aıyptaý osyndaı jolmen sorǵy stantsııasyn, sondaı-aq turǵyn úılerdi sýmen jabdyqtaý jáne jylytý júıelerin jóndeýge bólingen 8 mln teńgeden astam qarajatty ıemdengenin dáleldedi. Mundaı isterdiń saldary árdaıym zalal sanynan áldeqaıda aýyr. Birinshiden, bul bılikke degen senimniń buzylýy. Úkim 2025 jyldyń 26 tamyzynda zańdy kúshine endi, — delingen vedomstvo habarlamasynda.
Oblys prokýratýrasy «Zań men Tártip» tujyrymdamasyn iske asyrý sheńberinde laýazymdy jáne materıaldyq jaýapty tulǵalardyń bıýdjet qarajatyn ıemdenýi nemese ysyrap etýi Qazaqstan Respýblıkasynyń qoldanystaǵy zańnamasyn óreskel buzý bolyp tabylatynyn eske salady.
Budan buryn Petropavlda nemereleri ájesiniń ósıetin sot arqyly jaramsyz dep tanyǵanyn jazdyq.