Petropavlda sońǵy eki kúnde bala zorlaýdyń eki faktisi tirkeldi
Soltústik Qazaqstan oblysy polıtsııa departamenti baspasóz qyzmetiniń málimetinshe, 3 tamyz kúni 9 jastaǵy balaǵa qatysty seksýaldyq sıpattaǵy zorlyq-zombylyq áreketterin jasady degen kúdikpen oblys ortalyǵynyń buryn sottalǵan turǵyny ustaldy. Osy derekke qatysty qylmystyq is qozǵaldy. Fakti «Jas balaǵa qatysty jasalǵan seksýaldyq sıpattaǵy zorlyq-zombylyq áreketteri» boıynsha Sotqa deıingi tergep-tekserýlerdiń biryńǵaı tizilimine engizildi. Kúdikti ýaqytsha ustaý ızolıatoryna qamaldy. Tergeý júrgizilip jatyr.
Al ekinshi oqıǵa búgin bolǵan. Petropavlda WhatsApp jelisindegi ata-analar chattarynda keshke qaraı pedofıldiń jas qyzdy zorlaǵandyǵy jaıynda eskertken jazbalar tarady.
Qala turǵyndarynyń aıtýynsha, oqıǵa Petropavldaǵy Meşan ormanynda, týbdıspanserdiń mańynda bolǵan. 13 jastaǵy qyzǵa zorlyq jasaǵan er adam oqıǵa ornynan qashyp ketken.
Polıtseıler bul oqıǵany da rastady. Fakti QR Qylmystyq kodeksiniń 121-babynyń 4-bóligi boıynsha Sotqa deıingi tergep-tekserýlerdiń biryńǵaı tizilimine engizildi. Qazirgi ýaqytta kináli tulǵany anyqtaý jáne ustaý boıynsha jedel-izdestirý is-sharalary júrgizilip jatyr. Tártip saqshylary ata-analardy asa saq bolyp, balalaryn qaraýsyz qaldyrmaýdy eskertti.
Baspasóz qyzmetiniń málimetinshe, bul qylmystar SQO PD-niń jáne oblys prokýratýrasy basshylyǵynyń erekshe baqylaýynda.