Petropavlda sońǵy bes jylda 1700 eski úı súrilgen
SQO ákimdiginiń málimetinshe, 2017 jyldan bastap Petropavlda 1700 eski jáne apattyq jaǵdaıda turǵan úı buzylyp alynǵan.
Onyń ornyna kópqabatty turǵyn úıler jáne áleýmettik nysandar turǵyzylyp jatyr.
«Bul jerlerdiń artyqshylyǵy qajetti ınjenerlik ınfraqurylym bar. Bul bıýdjet qarajatyn únemdeýge kómektesedi. Oblys ortalyǵynda negizinen Jas órken, Ortalyq, Bereke, Kopaı shaǵynaýdandarynda qurylys júrip jatyr. Máselen Jas órken shaǵynaýdanynda súrilgen úılerdiń ornyna 3,5 myńǵa jýyq páteri bar 25 kópqabatty úı salyndy. Qazir bıýdjet esebinen 1125 páterli 10 baspana salynyp jatyr. Bul aýdanda ǵana 816 eski úı súrildi», - deıdi SQO ákiminiń orynbasary Sátjan Ablalıev.
Ortalyq shaǵynaýdanynda 120 eski úıdiń ornyna 528 páterli 6 úı salyndy, taǵy 342 páterli úsh úı salynyp jatyr.
Bereke shaǵynaýdanynda 117 eski jeke turǵyn úı buzyldy. Jyl sońyna deıin 600 páterli 6 jalǵa beriletin baspana qoldanysqa berilmek.
Kopaı shaǵynaýdanynda joba boıynsha 44,6 ga-ǵa 2800 páterlik 27 kópqabatty úı salynbaq. Nátıjesinde 9800 adamnyń turǵyn úı jaǵdaıy jaqsarady.
«Qazir «Kopaı» shaǵynaýdanynda turǵyzylatyn 6 úı boıynsha qurylys uıymdary anyqtaldy. Іrgetasy qalanyp jatyr. 3 úı boıynsha konkýrstyq rásimder júrgizilip jatyr. Taǵy 6 úı boıynsha memlekettik satyp alý jarııalaý úshin qujattary ázirlenip jatyr. Shaǵynaýdandy qajetti ınjenerlik ınfraqurylymmen qamtý úshin bir joba ázirlendi. 4 mlrd teńgege 4,288 km sý jelisi, 2,5 km elektr jáne 0,8 km jylýmen qamtý jelisi salynbaq», - deıdi Sátjan Ablalıev.
Foto: www.js-wagner.fr
