Petropavlda sońǵy 4 jylda jastar sany shamamen 4 myńǵa kemigen
Petropavl qalalyq ishki saıasat bóliminiń basshysy Azat Ibraevtyń aıtýynsha, Petropavlda qazirgi ýaqytta jastar sanatyna jatatyn 36,1 myń adam bar. Bul 2019 jylmen salystyrǵanda 4 myńǵa jýyq adamǵa az. Al 15 pen 29 jas aralyǵyndaǵy 564 jas esh jerde oqymaıdy jáne jumys istemeıdi.
«Jastar máselesi basty nazarda. Osyǵan baılanysty jyl saıyn oblys ortalyǵynda memlekettik áleýmettik tapsyrystar júzege asyrylyp, oǵan jastar belsendi qatysyp keledi. Petropavldyń kásiporyndaryna ekskýrsııalar uıymdastyrylyp, jas kásipkerlermen kezdesýler ótkiziledi. Túzetý mekemelerinen bosap shyqqan, esepte turǵan jastarmen jeke jumystar júrgiziledi. Jastar resýrstyq ortalyǵy jumysqa ornalasý boıynsha keńester berip, jyl basynan beri júzden astam qyz-jigit halyqty jumyspen qamtý ortalyǵy arqyly jumysqa turdy», - deıdi Azat Ibraev.
Mamannyń pikirinshe, NEET sanatyndaǵy jastardyń jumysqa ornalasa almaýynyń negizgi sebepteriniń biri - kópshiliginde jumys berýshimen jumysqa ornalasý kezinde qajet minez-qulyq daǵdylary joq. Sondyqtan osy sanatpen jumys olardy áleýmettik ómirge beıimdeýge, memlekettik baǵdarlamalar týraly aqparattandyrýǵa, qaıta oqytý jáne kásiptik oqytý múmkindikteri týraly keńester ótkizýge, jumys izdeý jáne qaıda júginý kerektigi jóninde keńes berýge baǵyttalǵan.
Jalpy jyl basynan Petropavlda 200-ge jýyq jas «Bastaý bıznes» arqyly kásipkerliktiń negizin úırense, 22-sy memlekettik grantty alyp, óz kásibin bastap ketken. 200-ge jýyq adam «Jastar tájirıbesi» memlekettik baǵdarlamasy boıynsha jumysqa ornalassa, 150 adam qoǵamdyq jumystarǵa tartyldy.
