Petropavlda sómkesine esirtki salyp júrgen áıel qoǵamdyq jumysqa jegildi

PETROPAVL. QazAqparat – Petropavlda qarasorany óz paıdalanýy úshin sómkesine salyp júrgen áıel ákimshilik jaýapkershilikke tartyldy, dep habarlaıdy QazAqparat tilshisi.

Soltústik Qazaqstan oblysy qylmystyq atqarý júıesi departamenti baspasóz qyzmetiniń málimetinshe, Petropavldyń 35 jastaǵy turǵyny tamyz aıynyń basynda jabaıy ósken qarasorany kórip, ony úıine ákelip keptirgen. Áıel esirtkini ózi shekpek bolý úshin daıyndaǵan eken.

Bir aptadan keıin ony polıtsııa qyzmetkerleri temirjol vokzalynda temeki shegip turǵan jerinen ustaıdy. Qoǵamdyq orynda shylym tartqany úshin ákimshilik hattama toltyrady. Tekserý kezinde áıeldiń sómkesinen az mólsherde marıhýana salynǵan paket tabylady.

Sotta áıeldiń kinási tolyq dáleldendi, ol da óziniń kináli ekenin moıyndap, ókinish bildirdi. Osyny eskergen sýdıa oǵan 80 saǵattyq qoǵamdyq jumys túrinde jaza taǵaıyndady.

«80 saǵat qoǵamdyq jumys túrindegi jazany sottalýshy oqýdan bos ýaqytynda nemese negizgi jumysynan bosatylyp, kúnine 4 saǵattan ǵana atqarady. Qazirgi ýaqytta ol qalany tazalaý jumystaryna tartylǵan», - deıdi SQO boıynsha QAJD bastyǵynyń orynbasary Danııar Harıpov.

Búgingi tańda probatsııalyq qyzmet esebinde SQO boıynsha 18 sottalǵan qoǵamdyq jumystarǵa tartylǵan.