Petropavlda soǵys ýaqytyndaǵy mańyzdy nysandardyń onlaın kartasy jasalyp jatyr
PETROPAVL. KAZINFORM – Petropavlda 10-synyp oqýshysy ustazynyń jetekshiligimen jeńisti jaqyndatýǵa úles qosqan zaýyt-fabrıkalardyń jáne evakogospıtaldardyń onlaın kartasyn ázirlep jatyr.
Anel Orazbekova – Nazarbaev zııatkerlik mektebinde oqıdy. Jeńistiń 80 jyldyǵyna oraı oqýshy ustazy Dýman Zakırınmen estelik kartasyn jasap jatyr.
- Bizdiń negizgi maqsat – Petropavl qalasynda Otan soǵysyna úles qosqan kásiporyndardy anyqtap, umytylyp ketken, jabylyp qalǵan ǵımarattardy Google Maps arqyly onlaın kartaǵa ornalastyrý. Oblys ortalyǵynda soǵys ýaqytynda zaýyttar qarý-jaraq jasady. Sondaı-aq kóptegen evakogospıtal bolǵan eken. Sonyń biri qazirgi mektepterdiń birinde jumys istegen. Sony biz zerttep, taýyp, qaısy qaı jerde bolǵanyn anyqtadyq. Áli jumysty tolyq aıaqtaǵan joqpyz. Ázirge 15 nysandy anyqtadyq, - deıdi tarıh pániniń muǵalimi Dýman Zakırın.
Ǵylymı jobany jazý barysynda ustaz oqýshysymen oblystyq ólketaný mýzeıimen jumys istegen. Tarıhı-mádenı muralardy qorǵaý men qoldaný ortalyǵynda boldy. Máselen, soǵys ýaqytynda Petropavlda ǵana bes evakýatsııalyq gospıtal jumys istegen. Sonyń biri qazirgi Abaı men Astana kósheleriniń qıylysyndaǵy №1 jalpy bilim beretin lıtseıde ornalasqan. Al 1941 jyly 21 shildede qurylǵan № 3595 evakogospıtal qalanyń ortalyǵynda bolǵan, biraq naqty mekenjaıyn anyqtaý múmkin bolmady.
Petropavlda qarý-jaraq shyǵaratyn birneshe zaýyttyń bolǵany kópshilikke belgili. Budan bólek temeki ónimderin shyǵaratyn, tigin fabrıkalary jumys istegen eken.
- Bul jaı zertteý emes, tarıhı muramyzdy saqtaý. Men sııaqty jastar soǵys ýaqytynda tylda jumys istegen eńbekkerlerdiń eren eńbegin bile bermeıdi. Bul joba tylda jumys istegen kásiporyndarmen tanystyrady. Jobany aıaqtaǵannan keıin aldaǵy ýaqytta osy kartany týrıstik marshrýtqa engizip, qoldaný josparlanǵan. ıAǵnı qala ishinde avtobýspen júrip, tarıhı nysandarǵa ekskýrsııa júrgiziledi, - deıdi Anel Orazbekova.
Keıin osy karta aıasynda arnaıy stend te jasalmaq.
Buǵan deıin soǵys ýaqytynda Petropavldaǵy kombınat jumysshylary jospardy 6 ese artyq oryndaǵanyn jazǵan edik.
