Petropavlda soǵys ardageriniń jaraqattanýyna qatysty tergeý júrip jatyr

PETROPAVL. KAZINFORM — Petropavlda 99 jastaǵy Ekinshi Dúnıejúzilik soǵys ardageri Vasılıı Makıenkonyń aýyr jaraqat alý faktisi boıynsha polıtsııa sotqa deıingi tergep-tekserýdi júrgizip jatyr.

Soltústik Qazaqstan oblystyq polıtsııa departamenti baspasóz qyzmetiniń málimetinshe, oqıǵa týraly habar polıtsııaǵa 20 sáýir kúni tústi. Tekserý barysynda sol kúni kúndiz N.Nazarbaev pen Ǵ.Músirepov kósheleriniń qıylysynda ardagerdiń baǵdarshamnyń ruqsat etilgen jasyl shamyna joldy kesip ótpek bolǵany anyqtaldy.

Sol sátte qala mektepteriniń biriniń 9 jasar oqýshysy júgirip ótip bara jatyp, zeınetkerdi baıqamaı qaǵyp ketken. Zeınetker qulap, jaraqat aldy. Aýyr dene jaraqatyn alǵan Vasılıı Makıenko medıtsınalyq mekemege jetkizildi.

Qazirgi tańda polıtsııa qyzmetkerleri oqıǵaǵa qatysy bar barlyq adamdy jáne kýágerlerdi anyqtady. Tergeý jumystary jalǵasyp jatyr, oqıǵanyń mán-jaıyna quqyqtyq baǵa beriletin bolady.

Sondaı-aq búgin SQO ákimi Ǵaýez Nurmuhambetov aýrýhanaǵa baryp, soǵys ardageriniń hal-jaǵdaıyn surap bildi. Qazir ardagerge qajetti medıtsınalyq kómek kórsetilip jatyr.

— Vasılıı Vasılevıch úlken jasyna qaramastan belsendi ómir saltyn ustanyp keldi. Byltyr Jeńis kúnine oraı Máńgilik alaýǵa gúl shoqtaryn qoıý rásimine qatysty. Kelesi jyly ardager óziniń ǵasyrlyq mereıtoıyn atap ótpek. Ardagerge tezirek saýyǵyp ketýin tilep, Jeńistiń 80 jyldyǵyn otbasymen, jaqyndarynyń ortasynda qarsy alatynyna úmit bildirdim. Ardagerler — bizdiń maqtanyshymyz, tarıhtyń kýási. Olarǵa qamqorlyq jasaý jáne qaýipsizdigin qamtamasyz etý — barshamyzdyń mindetimiz. Jastardyń úlken býynǵa qurmetpen qaraýyn jáne olarǵa qıyn sátte kómek kórsetýge umtylysyn qalyptastyrý mańyzdy, — dep jazdy óńir basshysy áleýmettik jelide.

Buǵan deıin Petropavlda jasóspirim qaǵyp qulatqan soǵys ardageri aýrýhanaǵa túskenin jazǵan edik.