Petropavlda sıntetıkalyq esirtki jasap kelgen shaǵyn zerthana joıyldy
Soltústik Qazaqstan oblysy polıtsııa departamenti baspasóz qyzmetiniń málimetinshe, jyl basynda polıtseıler nazaryna kúdik týdyrǵan birneshe jigit iligedi. Olar Petropavl aýmaǵynda sıntetıkalyq esirtkilerdi taratyp kelgen. 2 aqpan kúni esirtkini jasyryn orynǵa salyp jatqan jerinen 26 jastaǵy qala turǵyny ustaldy.
Tintý kezinde odan on bes túıinshek tabylyp, tárkilendi. Saraptama onyń eń qaýipti sıntetıkalyq esirtkilerdiń biri - «mefedron» ekenin kórsetti. Bastapqyda er adam óziniń bul zatqa qatysy joqtyǵyn dáleldep baqty. Biraq kóp uzamaı jedel ýákilderdiń onyń kásibi týraly jaqsy habardar ekenin túsinip, túsiniktemelerin ózgertti.
Jigittiń aıtýynsha, ol esirtkini ınternet arqyly alyp otyrǵan. Onyń mindetine túıinshekterdi belgili jerlerge jasyryp, qaldyrý kiripti.
Kóp uzamaı polıtseıler «satýshyny» da qolǵa túsirdi. Petropavldyń 26 jastaǵy turǵynynyń jaldamaly páterinen esirtki jasaýǵa arnalǵan qural-jabdyq jáne satýǵa daıyn turǵan 160 gramm sıntetıkalyq esirtki tabylyp, tárkilendi.
«Sıntetıkalyq esirtki úshin asa iri mólsher úsh gramnan bastalady, bul sıntetıkalyq esirtkilerdiń qanshalyqty qaýipti ekenin kórsetedi. Atalǵan faktige qatysty QR Qylmystyq kodeksiniń 297-babynyń 3-bóligi boıynsha qylmystyq is qozǵaldy.
Ustalǵandar Petropavl qalalyq polıtsııa basqarmasynyń ýaqytsha ustaý ızolıatoryna qamaldy», - deıdi SQO Esirtki qylmysyna qarsy is-qımyl basqarmasynyń bastyǵy Jandos Basybaev.
Eki kúdikti 10 jyldan 15 jylǵa deıin bas bostandyǵynan aıyrylýlary múmkin.
Basty fıgýrant esirtki satatyn ınternet-dúkenniń jumysyn júrgizdi degen kúdikke ilingen. Jaldamaly páterden indetke qarsy kostıýmder, salatyn materıaldar, tarazy, sıntetıkalyq esirtkini jasaýǵa qajetti suıyq komponentter tabyldy, ıaǵnı shaǵyn zerthana uıymdastyrylǵany anyq.
Jyl basynan soltústikqazaqstandyq polıtseıler osymen ekinshi esirtki zerthanasyn áshkerelep otyr.
