Petropavlda sıntetıkalyq esirtkini jasyryp, taratty degen kúdikpen áıel ustaldy
PETROPAVL. KAZINFORM – Petropavlda 300 gramǵa jýyq sıntetıkalyq esirtkimen qala turǵyny ustaldy.
Soltústik Qazaqstan oblysy polıtsııa departamenti baspasóz qyzmetiniń málimetinshe, kúdiktini esirtki qylmysyna qarsy is-qımyl basqarmasynyń qyzmetkerleri ustady. 39 jastaǵy áıel sıntetıkalyq esirtki taratýmen aınalysatyn ınternet-dúkenderdiń birinde býyp-túıýshi bolyp jumys istegen. Ony ustaǵan kezde qaltasynan, jaldamaly páterdiń dárethanasy men jatyn bólmesinen, ózi esirtki jasyrǵan oryndardan ishine untaq zat salynǵan shaǵyn qaltashalar men túıinshekter tabyldy.
Saraptama nátıjesi tárkilengen zattardyń jalpy salmaǵy 227,97 gramm «α-PvP» sıntetıkalyq esirtkisi jáne 57,57 gramm «mefedron» ekenin kórsetti.
Sondaı-aq, elektrondyq tarazy, oraýǵa arnalǵan materıal men esirtkini býyp-túıýde qoldanatyn basqa quraldar tárkilenip alyndy.
«Kúdiktiniń ózi esirtkige táýeldi, buryn esirtki saqtaǵany úshin isti bolǵan. Alaıda odan sabaq almaǵan. Qolda bar aqparatqa sáıkes, ol býyp-túıýshi bolyp tek 3 aı ǵana jumys istep úlgergen. Endi asa iri kólemde esirtki ótkizgeni úshin ol QR Qylmystyq kodeksiniń 297-babynyń 3-bóligi boıynsha 10 jyldan 15 jylǵa deıingi merzimge deıin bas bostandyǵynan aıyrylýy múmkin», - deıdi SQO PD Esirtki qylmysyna qarsy is-qımyl basqarmasynyń bastyǵy Rýslan Saparov.
Jyl basynan SQO aýmaǵynda polıtseıler 2 keliden astam sıntetıkalyq esirtki tárkiledi.
