Petropavlda sıntetıkalyq esirtki taratqan turǵyn 7 jylǵa sottaldy

PETROPAVL. KAZINFORM – Petropavl turǵyny sıntetıkalyq esirtki satqany úshin 7 jylǵa sottaldy.

Polisia.kz portalynyń málimetinshe, qańtar aıynda Petropavl qalasynyń 32 jastaǵy turǵyny ınternet arqyly «jeńil tabys» tabýǵa qyzyǵyp, sıntetıkalyq esirtki saýdasymen aınalysatyn onlaın-dúkenderdiń birinde oraýshy retinde jumys isteı bastaǵan.

Kýratorynan nusqaý alyp, ol iri kólemde jetkizilgen esirtkini shaǵyn zıp-paketterge bólip, olardy tapsyrys bergenderge jasyryn oryndar arqyly taratýmen aınalysqan. Qylmystyq top bul jumysty «qaýipsiz» dep sendirgenimen, arada kóp ýaqyt ótpeı-aq er adam quqyq qorǵaý organdarynyń nazaryna ilikti.

Aqpan aıynda ol Petropavl qalasynyń shetinde qolǵa tústi. Tintý kezinde onyń jaldamaly páterinen 200 gramnan astam mefedron men α-PvP esirtki zattary tabylyp, tárkilendi. Sonymen qatar tergeý barysynda anyqtalǵan jasyryn qoımadan jarty keliden astam sıntetıkalyq esirtki zaty alyndy. Bul — jyl basynan beri Soltústik Qazaqstan oblysynda tárkilengen eń iri esirtki partııalarynyń biri boldy.

Sot tergeý nátıjesinde aıyptalýshyny asa iri kólemde esirtki zattaryn daıyndap, saqtap jáne taratqany úshin kináli dep tanyp, 7 jylǵa bas bostandyǵynan aıyrdy.

Jalpy, bıylǵy jyldyń 9 aıynda Soltústik Qazaqstan oblysynyń polıtseıleri zańsyz aınalymnan 771 keli túrli esirtki zatyn, sonyń ishinde 4,5 keli sıntetıkalyq esirtkini tárkilegen.