Petropavlda shujyqtan antıbıotık tabyldy

PETROPAVL. QazAqparat - Petropavlda dúken sórelerindegi shujyqtardan ruqsat etilgen normadan artyq antıbıotıkter tabyldy, dep habarlaıdy QazAqparat tilshisi.

Óńirlik qoǵamdyq densaýlyq saqtaý departamenti baspasóz qyzmetiniń málimetinshe, Ulttyq saraptama ortalyǵynda júrgizilgen zertteý nátıjesi boıynsha shujyqtardan levomıtsetınniń ruqsat etilgen deńgeıden asyp ketkeni anyqtalǵan.

«Tekserý barysynda Oral qalasyndaǵy «Agroprodýkt LTD» JShS jasap shyǵarǵan «MıASODEL Ýralsktiń» sıyr etinen jasalǵan shujyǵynan jáne «Dobryı prodýkt» ónimderinen antıbıotıktiń shekten tys mólsheri tabyldy. «Omskıı bekon» AQ kompanııasynyń pisirilgen qus etinen jasalǵan «ZAREChNAıA» shujyǵy tehnıkalyq reglamentke saı emes», - dedi Petropavl qalalyq qoǵamdyq densaýlyq saqtaý basqarmasynyń basshysy Erkin Ybyraev.

Qaýipti ónimdi joıý týraly komıssııa sheshimi qabyldanǵanǵa deıin atalmysh shujyqtardyń barlyǵy satylymnan alynady.

«Qalalyq qoǵamdyq densaýlyq saqtaý basqarmasynyń bazasynda veterınarlyq baqylaý, ekologııa, qoǵamdyq uıym mamandarynyń qatysýymen qaýipti ónimderdi joıý boıynsha komıssııa ótti», - dedi E. Ybyraev.

Barlyǵy 12 keli shujyq ónimi joıyldy. Bul ónimder Petropavl qalasyndaǵy veterınarlyq stansanyń peshinde órteldi.