Petropavlda «Shoqtyǵy bıik esimder» atty kórme ashyldy

PETROPAVL. QazAqparat – Petropavlda «Shoqtyǵy bıik esimder» atty kórme ashyldy. Bul jerden bıyl mereıtoılary atap ótiletin, qazaq ádebıeti men mádenıetiniń damýyna zor úles qosqan birtýar tulǵalardyń jeke zattaryn, qujattaryn kórýge bolady, dep habarlaıdy QazAqparat tilshisi.

Bir jyl boıy jumys isteıtin kórme Soltústik Qazaqstan oblystyq tarıhı-ólketaný mýzeıinde ashylǵan. Bıyl Qyzyljar óńiriniń týmasy, qazaqtyń kórnekti jazýshysy, sóz zergeri Ǵabıt Músirepovtyń týǵanyna 120 jyl tolady. Kórkem sózdiń has sheberi Safýan Shaımerdenovtiń 100 jyldyǵy, Uly Otan soǵysynyń ardageri, Qazaq KSR Mınıstrler Keńesiniń tóraǵasy Báıken Áshimovtiń 105 jyldyǵy atap ótiledi.

«Elimiz dana, kemel tulǵalarǵa baı. Ásirese, Soltústik Qazaqstan jerinen qanshama tanymal azamattardyń shyqqanyn barshamyz bilemiz. Bıyl túrkitanýshy, pýblıtsıst Ahmet Baıtursynulynyń dúnıege kelgenine 150 jyl tolady. Ǵalymnyń mereıtoıy halyqaralyq deńgeıde atap ótilmek. Osyndaı erekshe kórmeniń tarıhı-ólketaný mýzeıinde ashylǵanyna qýanyshtymyz»,- dedi tarıh ǵylymdarynyń doktory, professor, Qazaq ulttyq jaratylystaný ǵylymdary akademııasynyń akademıgi Aqmaral Ibraeva.

«Shoqtyǵy bıik esimder» kórmesine bıylǵy mereıtoı ıeleriniń fotosýretteri, qujattary jáne aqyn-jazýshylardyń qalamynan týǵan shyǵarmalary qoıylǵan. Kórermen nazaryna usynylǵan dúnıelerdiń ishinde Ǵabıt Músirepovtiń qoldanǵan jeke zattary da bar. Sonyń biri - bala kúninde paıdalanǵan er-toqym.

Bıyl, sondaı-aq, soltústikqazaqstandyq ǵaryshker Vladımır Shatalovtyń da mereıtoıy, týǵanyna 95 jyl tolmaq. Eki dúrkin Keńes Odaǵynyń batyry byltyr Máskeýde qaıtys boldy. Kórmede ataqty ǵaryshker jaıynda da tyń derektermen tanysýǵa bolady. Máselen aıdyń betindegi kraterlerdiń biri Shatalovtyń esimimen atalǵan eken. Kelýshilerdiń nazaryna ǵaryshta ol qoldanǵan zattar, azyq-túlik konservileri, kıimderi usynylǵan.