Petropavlda sheneýnikterge birneshe ret para berip, memleket qarjysyn urlaǵan kásipker sottaldy
Petropavl qalalyq sotynyń málimetinshe, bul iste alty adamǵa aıyp taǵylǵan.
2021 jyly 21 sáýirde «Aveon-Sever» JShS dırektory jáne «KommýnStroıServıs» JShS jetekshisi S.V. «Petropavl-Mamlıýtka» tasjolynda avtokólikteri kedergisiz júrýi úshin dáneker Z.R. arqyly kóliktik baqylaý ınspektsııasynyń qyzmetkerlerine para bergen.
2021 jyldyń 3 shildesinde atqarylǵan jumysty esh kedergisiz qabyldap alyp, aqshany jedel túrde alýy úshin Mamlıýt aýdandyq sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń jetekshi maman mindetin atqarýshy K.E-ge 1,5 mln teńge para bergen.
Sondaı-aq Esil aýdandyq sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy I.K-ǵa 1 mln teńge parany ustatqan.
Kásipker «Kishkenekól-Teljan-Mortyq-Tileýsaı-Qaraterek» KT-83 jolynda jóndeý júrgizip, jumysty sapasyz atqarǵan. Osylaısha 30 mln astam teńgeni qaltasyna basqan.
Budan basqa «Aveon-Sever» JShS jáne «KommýnStroıServıs» JShS-niń esep shottaryna joldy kúrdeli jóndeýden jáne qardan tazartýǵa qatysty aqsha túsýine múddeli ol máselesin sheshý úshin para beretin adam izdegen.
K.D. aldap, bireýdiń múlkin ıemdený úshin S.V-den laýazymdy tulǵalarǵa dep 10 mln teńge alǵan.
Mamlıýt aýdandyq sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń jetekshi mamany mindetin atqarǵan.
Keıin bas maman bolǵan K.E. zańsyz kásippen aınalysyp, júk tasymaly úshin túrli jeńildikter bergen jáne bir kózden negizsiz kelisimsharttarǵa otyrǵan.
Osylaısha A.M. jeke kásipkerligine negizsiz 840 myń teńge tólengen.
K.E. 2021 jyldyń 6-21 jeltoqsany aralyǵynda osy bólimniń bas mamany qyzmetin atqaryp, sybaılas jemqorlyqqa jol bergen, ıaǵnı óziniń zaıyby aınalysatyn A.M. jeke kásipkerliginiń esep shotyna para retinde 4 mln astam teńge aýdarǵan.
Sottalǵandardyń basym bóligi kinásin moıyndamady nemese jekeleı ǵana moınyna aldy.
Petropavl qalalyq soty S.V-nyń «Kishkenekól-Teljan-Mortyq-Tileýsaı-Qaraterek» jolyn jóndeý kezinde qaltasyna zańsyz basqan aqshany erikti túrde qaıtarǵanyn esepke aldy.
Qalǵan sottalýshylardyń kishkentaı balalarynyń bolýy olardyń jazasyn jeńildetti.
Nátıjesinde sot S.V-ny 9 jylǵa bas bostandyǵynan aıyrdy.
Ol jazasyn qylmystyq atqarý júıesiniń ortasha qaýipsizdik mekemesinde ótkeredi. Ómir boıyna belgili bir laýazymdardy atqarý quqyǵynan aıyryldy.
K.D-nyń 3 jyl 6 aıǵa bostandyǵy shekteldi, osy aralyqta ol probatsııalyq baqylaýda bolady.
K.E. aldaǵy bes jylyn qylmystyq atqarý júıesiniń ortasha qaýipsizdik mekemesinde ótkizedi.
I.K. para alǵany úshin 47 mln teńgege jýyq aıyppul tóleıdi. Ol bul somany úkim kúshine engennen keıin bir aı ishinde qaıtarýy tıis.
Al para berýde dáneker bolǵan Z.R. jáne arandatýshylyqqa barǵan A.A Qazaqstannyń 30 jyldyǵyna oraı jarııalanǵan raqymshylyqqa iligip, jazadan qutyldy.
Sot úkimi áli zańdy kúshine engen joq.
