Petropavlda sheberlik saǵattary uıymdastyrylyp, ulttyq óner ulyqtaldy

PETROPAVL. QazAqparat – Petropavlda Naýryz meıramy qarsańynda ulttyq óner dáriptelip, jastar arasynda dástúrli án aıtý men kúı tartýdan, túrli qoldanbaly ónerden sheberlik saǵattary uıymdastyryldy, dep habarlaıdy QazAqparat tilshisi.

Erekshe jobany uıymdastyrýshy – Petropavl qalalyq mádenıet úıi. Ónerpazdar Naýryz meıramy qarsańynda jastardyń basyn qosyp, ónerdiń túrli salasynan aqparat berdi. Іs-sharaǵa kelgen oqý oryndarynyń oqýshylary men stýdentteri qyzyqty málimet alyp qana qoımaı, sheberlik saǵattaryna da qatysty.

Máselen Petropavldaǵy óner kolledji stýdentteri qazaqtyń ulttyq kıimderiniń kórmesin tamashalady. Ár kıimniń qandaı maqsatta kıilgeninen habardar boldy.

«Ulttyq kıim taqyryby biz úshin óte qyzyq. Qazaqstanda turǵan soń, qazaq halqynyń salt-dástúrin bilýge tıispiz. Búgin bizge sáýkeleni kimderdiń jáne qashan kıgenin aıtty. Bul óte ádemi bas kıim. Qyzdar ony ómirinde biraq ret, kúıeýge shyqqan kezde ǵana kıgen eken. Ony tipti basqa bireýge berýge, syılaýǵa bolmaıdy eken. Sondaı-aq qazaq qyzdary atpen shapqandyqtan kóılek astynan juqa shalbar kıgeni týraly da bildik», - deıdi kolledj stýdenti Marııa Lyrchıkova.

Al kelesi kabınette Petropavl temirjol kóligi kolledjiniń stýdentteri qýyrshaq teatrynnyń akterinen dáris aldy. Jastar qýyrshaqtardy oınatyp, qysqa qoıylym qoıdy.

Dombyra úırenem deýshilerge kóptegen respýblıkalyq baıqaýlardyń jeńimpazy, dástúrli ánshi Erkebulan Qarıpov sabaq berdi. Aqan Seri atyndaǵy oblystyq fılarmonııanyń ánshisi qalalyq mádenıet úıinde Úkili Ybyraı atyndaǵy dástúrli án synybyn da ashqan.

Jalpy qańtar aıynan beri Petropavl qalalyq mádenıet úıinde ádebı-kórkemdik, halyq mýzykalyq aspaptar, dombyra, sazsyrnaı úıirmeleri jumysyn bastady. Olar kelem deýshilerge tegin jumys isteıdi.