Petropavlda shaǵyn ózender sýy qaıta kóterilip jatyr
PETROPAVL. QazAqparat – Petropavlda sý tasqynynyń sharyqtaý shegi osy aptanyń sońy men kelesi aptanyń basynda bolady dep kútilýde. Qazir óńirdegi shaǵyn ózenderde sý deńgeıi qaıta kóterilip jatyr, dep habarlaıdy QazAqparat tilshisi.
«Qazgıdromet» RMK Soltústik Qazaqstan oblystyq fılıalynyń málimetinshe, ótken táýlikte Gýsakovka eldi mekeniniń mańynda Babyqburlyq ózeniniń deńgeıi 148 santımetrge, Kovylnoe eldi mekeniniń mańynda Aqqanburlyq ózeni 79 santımetrge, Severnoe aýylynyń mańynda Shaǵalaly ózeni 19 santımetrge kóterildi.
Sergeev sý qoımasynda sý deńgeıi túsip jatyr. Qazirgi ýaqytta bógenniń erneýinen tasyp aqqan sýdyń bıiktigi – 124 sm. 8 sáýirde munda eń joǵary kórsetkish – 196 sm tirkelgen edi.
Sergeev bógetinen tómen qaraı Esil ózeniniń deńgeıi kóterilip keledi. Máselen Pokrovka aýylynyń mańynda sý 88 santımetrge joǵarylady, osylaısha qaýipti meje – 950 santımetrden 40 santımetrge artyp, ózen arnasynan shyqty.
Sý Novonıkolskoe eldi mekeniniń mańynda 79 santımetrge, Dolmatovo aýylynyń mańynda 67 santımetrge kóterildi.
Al Petropavl qalasynda bir táýlikte Esil ózeniniń deńgeıi 195 santımetrden 620-ǵa jetti. Munda ózen arnasynan tasıtyn qaýipti meje – 1050 sm.
SQO Tótenshe jaǵdaılar departamenti de jaǵdaıdy baqylaýda ustap otyr. Mamandardyń aıtýynsha, Petropavlda sý tasqynynyń sharyqtaý shegi osy aptanyń sońy men kelesi aptanyń basynda bolady. 2017 jylǵydaı ózen arnasynan shyǵyp, jaıylmasa da, jaqyn mańdaǵy saıajaı ýchaskeleri sý astynda qalmaq.
