Petropavlda shaǵyn avtobýstyń neden órtengeni anyqtaldy
PETROPAVL. QazAqparat - Petropavlda mamandar shaǵyn avtobýstyń neden órtengenin anyqtady, dep habarlaıdy QazAqparat.
Soltústik Qazaqstan oblystyq tótenshe jaǵdaılar departamenti baspasóz qyzmetiniń málimetinshe, avtobýstyń órtenýine elektr júıesiniń qysqa tuıyqtalýy sebep bolǵan.
«Avtobýs aıaldamasynda órt shyqqany týraly aqparat 19:52-de kelip tústi. Tez arada órt sóndirý bóliminiń kezekshi qaraýyly oqıǵa ornyna jóneltildi. 19:59-da órt sóndirýshiler kelip jetkende avtokólikti tolyǵymen jalyn sharpyǵan bolatyn. Órt 20:03-te aýyzdyqtalyp, 20:09-da sóndirildi. Tilsiz jaý 10 sharshy metr aýmaqty qamtydy», - dep málim etti baspasóz qyzmeti.
Qyzyl jalyn shaǵyn avtobýsty tolyǵymen búldirip, jaramsyz etip tastaǵan. Departament mamandary avtokóliktiń 5-8 mınýtta tolyq janyp ketetinin aıtyp otyr.
«Elektr ótkizgishtiń qysqa tuıyqtalýy - avtokólik órtine ákelip soǵatyn óte keń taralǵan sebep. Avtokóliktiń tehnıkalyq jaǵdaıyn únemi qadaǵalap otyrý kerek, ásirese elektr jabdyqtaryn nazarda ustaǵan jón. Ot tutanǵanda tez arada órt sóndirýshilerdi shaqyryp, qoldan kelgenshe órtti sóndirýge tyrysý kerek, sondyqtan, ár avtokólikte jumys istep turǵan órt sóndirgish bolýy tıis», - dep atap ótti TJD baspasóz qyzmeti.
Avtor: Olesıa Jýkoven
