Petropavlda shaǵyn avtobýs órtendi
PETROPAVL. QazAqparat - Petropavlda shaǵyn baǵdarlyq avtobýs órtenip ketti, dep habarlaıdy QazAqparat.
Oqys oqıǵa Jumysshylar kentindegi sońǵy aıaldamada bolǵan. Qoǵamdyq kóliktiń órtengen vıdeosy áleýmenttik jelide jarııalandy.
Kýágerlerdiń aıtýynsha, avtobýs órtene bastaǵanda salonda jolaýshylar otyrǵan. Olar syrtqa shyǵyp úlgergen.
Óńirlik Tótenshe jaǵdaılar departamenti baspasóz qyzmetiniń málimetinshe, oqıǵa kezinde eshkim zardap shekpegen.
Órt sóndirýshiler tez jetkenimen shaǵyn avtobýs tolyq janyp ketti. Órt sóndirildi, qazir keltirilgen shyǵyn kólemi anyqtalyp jatyr.
Jolaýshylar tasymaly salasyndaǵy sapa men avtobýs parkin jańartý qalalyq jáne oblystyq ákimdikte jıi talqylanady. Soltústik Qazaqstan oblysynyń ákimi Qumar Aqsaqalov taıaýda ǵana Petropavl ákimi Bolat Jumabekovke qoǵamdyq kólik máselesimen aınalysýdy tapsyrǵan bolatyn.
Avtory Olesıa Jýkoven
