Petropavlda saılaý kúni ınvataksı men áleýmettik taksıler jumys isteıdi
PETROPAVL. QazAqparat – Petropavlda 20 qarasha kúni qoǵamdyq kólikte júrý tegin bolady. Budan basqa múgedektigi bar adamdar úshin ınva jáne áleýmettik taksıler qyzmet kórsetpek, dep habarlaıdy QazAqparat tilshisi.
Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, 20 qarashada qoǵamdyq kólik ádettegi kestege saı júredi. Bul kúni qalalyq avtobýstarmen qatynaý tegin bolady.
Sondaı-aq saılaý kúni barlyq ýchaskelerde býfetter jumys istemek.
«Oblys ortalyǵynda 94 saılaý ýchaskesi bar. Saılaýshylar tizimine 161 117 adam engizilgen.
Saılaý ýchaskeleri saıası naýqandy ótkizýge 100% daıyn», - dedi Petropavl saılaý komıssııasynyń tóraǵasy Keńes Muqyshev.
Ýchaskelerde múgedektigi bar azamattarǵa daýys berýge bar jaǵdaı jasalǵan. Ǵımarattarda arnaıy batyrma jumys isteıdi, pandýstar qoıylǵan. Sondaı-aq osy kúni múmkindigi shekteýli jandar ınvataksı men áleýmettik taksıdiń qyzmetin paıdalana alady. Osy maqsatqa 2 ınvataksı men 6 áleýmettik taksı qarastyrylǵan.
Jalpy SQO boıynsha 386 myńǵa jýyq adamnyń saýlaýǵa qatysyp, daýys berýge quqy bar. 20 qarasha kúni óńirde 655 saılaý ýchaskesi jumys istemek.
