Petropavlda saıajaıdaǵy úıleri sýǵa ketkender de birjolǵy tólem alatyn boldy

PETROPAVL. KAZINFORM – Petropavlda sý tasqyny kezinde 34 baý-baqsha qoǵamdastyǵy sý astynda qaldy. Endi ýchaskelerinde úıleri bar saıajaı ıelerine birjolǵy tólem berilmek.

Zardap shekken saıajaı ýchaskeleriniń ıeleri 100 AEK mólsherinde – 370 myń teńge alady.
Petropavl turǵyny Irına Kýpınanyń «Zvezdochka» baý-baqsha qoǵamdastyǵynda saıajaı ýchaskesi bar. Bıyl ol sýǵa ketti. Tasqyn ýchaskede turǵan eki qabatty úıdiń ekinshi qabatyna deıin kóterilgen.

«2017 jyly sý tasqyny bolǵanda úıimizge kirgen sýdyń bıiktigi 1,5 metrge deıin jetti. Teledıdar, tońazytqyshymyz, úıdegi jıhazdyń barlyǵy jaramsyz bolyp qaldy. Sol jolǵydan esimizdi áli jınap úlgermegen edik. 

Bul joly sý kele jatyr dep eskertti. Biraq dál munsha kóteriledi dep oılaǵan joqpyz. Zattardy ekinshi qabatqa shyǵardyq. Biraq sý onda da jetti. Monsha, qora-qopsy – sýdan kórinbeı qaldy. Qurylys materıaldaryn alyp qoıyp edik», - deıdi Petropavl turǵyny. 

Saıajaı ýchaskesi áli sýda tur. Irınanyń aıtýynsha, osydan jeti jyl burynǵy sý tasqyny kezinde jemis aǵashtary, ekken kópjyldyq gúlderi, jıdekteri – bári shirip ketken. 

«Sol jylǵy tasqynnan keıin baqshamen aınalyspaımyn dep edim, biraq ýaqyt óte kele bárin umytasyń ǵoı. Byltyrlary jańadan jemis aǵashtaryn, shyrshalar, gortenzııa gúlderin ákelip otyrǵyzyp edik. Onyń ózi qanshama qarajat qoı! Shyǵyn shash-etekten. Az da bolsa shyǵynymyzdy óteıtinin estip, kóńilimiz kóterildi», - deıdi Irına Kýpına. 

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavlda 6597 saıajaı ýchaskesi sý astynda qaldy, onyń 700-den astamy ıesiz. Birjolǵy kómekti saıajaı ýchaskesinde úıi bar 3031 turǵyn almaq. 

Buǵan deıin ShQO-daǵy Altaı aýdanynda aýlalardan sý sorylyp, jaǵdaıdyń qalypqa kele bastaǵanyn aıtqan edik.