Petropavlda saýna órtendi
PETROPAVL. QazAqparat – Petropavlda saýna órtenip, jalyn 500 sharshy metr aýmaqty jalmady, dep habarlaıdy QazAqparat tilshisi.
SQO tótenshe jaǵdaılar departamenti bastyǵynyń orynbasary Oral Ábdirahmanovtyń aıtýynsha, 101 pýltine saǵat 00.53 mınýt ketkende Petropavldaǵy Amangeldi kóshesindegi 148 úıde órt shyqqandyǵy jóninde habarlama túsken.
«Oqıǵa ornyna birden órt sóndirýshiler attanady. Mamandar kelgen kezde eki qabatty ǵımarat jalynǵa oranyp úlgergen eken. Qalyń tútin bolǵan. Órttiń taralýyna baılanysty joǵary nómir boıynsha Petropavldyń barlyq órt sóndirý bólimsheleri jumyldyryldy.
Órtti sóndirý kezinde birqatar qıyndyq boldy. Nysanǵa aparar jol shektelgen, ǵımarattyń qasynda basqa nysandar boldy», - deıdi Oral Ábdirahmanov.
Eki qabatty ǵımarattyń birinshi qabatynda buryn «Elim-aı» meımanhanasy ornalassa, qazir saýna bolyp qaıta ashylǵan. Ekinshi qabatta keńseler bolǵan.
«Órt 500 sharshy metr aýmaqta shyqqan. Qazirgi tańda oqıǵa ornynda zerthana qyzmetkerleri jumys istep jatyr. Órttiń shyǵý sebebin anyqtaıdy. Aldyn ala boljam boıynsha, elektr symdarynyń qysqa tuıyqtalýynan shyqqan.
Materıaldyq shyǵyn anyqtalyp jatyr. Ǵımarattyń shatyrynyń bir bóligi, qabyrǵalary, ekinshi qabatta ornalasqan jıhaz ben turmystyq tehnıka janyp ketti», - deıdi departament basshysynyń orynbasary.
Saýnadaǵy órtti sóndirýge jeke quramnan 87 adam men 17 tehnıka jumyldyryldy. Órt tek tańǵy saǵat 5.00 shamasynda ǵana tolyq sóndirildi.
Jalpy jyl basynan SQO-da 419 órt tirkeldi. Saldarynan 36 adam mert boldy.
Mamandardyń aıtýynsha, órttiń shyǵýyna negizgi sebepter - elektr symdaryn montajdaý kezinde qaýipsizdik erejelerin saqtamaý, ekinshisi - halyqtyń otty abaısyz qoldanýy.
