Petropavlda saýda úıi órtenip, 250 adam evakýatsııalandy

PETROPAVL. QazAqparat – Petropavldaǵy «Magným» sýpermarketi ornalasqan ǵımaratta órt shyǵyp, 250 adamdy qaýipsiz jerge shyǵarýǵa týra keldi. Zardap shekkender men qaza tapqandar joq, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin saǵat 10.44-te «101» nómirine Petropavldaǵy S.Muqanov, 53 mekenjaıynda ornalasqan saýda ortalyǵynda órt shyqqany týraly habar túsken. Telefon soqqan adam birinshi qabattaǵy býtıkterdiń biriniń janyp jatqanyn aıtqan.

«Bul saýda úıi halyq kóp baratyn nysan bolǵandyqtan, oqıǵa ornyna órt sóndirý bólimsheleri joǵary dárejeli shaqyrtý boıynsha attandy. Alǵashqy órt sóndirý mashınalary 3 mınýttyń ishinde jetti. Saǵat 11.28 mınýt ketkende jalyn aýyzdyqtalyp, jarty saǵattan keıin tolyq sóndirildi. Órt shalǵan aýmaq 30 sharshy metr shamasynda», - delingen departamenttiń baspasóz qyzmetiniń habarlamasynda.

Ǵımarattan 250 adamdy evakýatsııalaýǵa týra keldi. Mamandardyń aıtýynsha, qaza tapqandar, zardap shekkender joq.

Ázirge órttiń neden shyqqany, sondaı-aq kelgen shyǵyn mólsheri de belgisiz.

«Órtti sóndirýge jeke quramnan 41 adam jáne 13 arnaıy tehnıka jumyldyryldy. Oqıǵa ornynda mamandar áli de jumys istep jatyr. Órt birinshi qabattaǵy kıim-keshek satatyn býtıkten shyqqan. Qalǵandaryna zaqym kelgen joq. Ǵımarattan shyǵarylǵan adamdardyń bir bóligi eki «vahtovka» kóligine ornalastyryldy. Keıbirine departamenttiń psıhologtarynyń kómegi qajet boldy», - dedi Órt sóndirý jáne avarııalyq-qutqarý jumystaryn uıymdastyrý bóliminiń bastyǵy Ádil Spaen.

Ázirge órttiń neden shyqqany, sondaı-aq kelgen shyǵyn mólsheri de belgisiz.

Foto: SQO TJD