Petropavlda saýda oryndarynda urlyq jasaǵandar ustaldy
PETROPAVL. QazAqparat – Petropavlda tártip saqshylary «birneshe dúkendi tonady» degen kúdikpen oblys ortalyǵynyń úsh turǵynyn ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimeti boıynsha, saýda oryndaryna kirgen úsheýdiń ekeýi satyp alýshy retinde satýshynyń nazaryn aýlaǵan. Al úshinshisi osy sátti paıdalanyp, zattardy jymqyryp otyrǵan.
Krımınaldy polıtsııa bóliminiń qyzmetkerleri Qyzyljar aýdandyq polıtsııa bólimindegi áriptesteriniń kómegimen úsheýdiń izine túsedi. Olardy qolǵa túsirý úshin birneshe kún ketti. Kúdiktiler páter jaldap, turatyn jerlerin aýystyryp otyrǵan.
Buryn birneshe ret urlyq jasaǵany úshin sottalǵan Petropavl qalasynyń 44, 33 jáne 31 jastaǵy úsh turǵyny ustaldy. «Urlyq» jáne «tonaý» baptary boıynsha qylmystyq is qozǵaldy. Kúdiktiler tergeý oqshaýlaǵyshynda qamaýda otyr.
«Qazir olardyń osyndaı qylmystarǵa qatystylyǵy tekserilip jatyr. Ázirshe kúdiktilerdiń 6 qylmys jasaǵany anyqtaldy. Sonyń birinde olar saýda ornynan 480 myń teńgeniń dúnıesin alyp ketken. Qylmysty ashýda dúken ıeleri ornatqan beınekameralardyń kómegi zor boldy», - deıdi Petropavl qalalyq polıtsııa basqarmasy Múlik qylmysyn tergeý boıynsha bólimniń bastyǵy Erbolat Qaptaev.
Jalpy, byltyr oblystyń dúkenderi men saýda oryndarynda 187 urlyq jasalyp, onyń 141-inde is sotqa deıin jetti.
