Petropavlda saýda ortalyǵynda birneshe býtık órtenip ketti
PETROPAVL. QazAqparat – Petropavlda «Evrazııskıı» saýda ortalyǵynda órt shyǵyp, 450 sharshy metr aýmaq órtenip ketti, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, saýda ortalyǵynda órt tańǵy saǵat 4.00 shamasynda shyqqan. Órt sóndirýshiler alty mınýtta jetti. Olar kelgen kezde ǵımarat qalyń tútinge oranyp, ishindegi birneshe býtık janyp jatqan.
«Oqıǵa ornynda dereý órt sóndirý shtaby uıymdastyryldy. Órtti birden 4 ýchaskede sóndirýge týra keldi. 16 negizgi jáne qosalqy tehnıka men jeke quramnan 54 adam jumyldyryldy. Qoıý tútin, joǵary temperatýra men ǵımarattyń kúrdeli josparlanýy mamandardyń jumysyn qıyndatty. Sý bazar aýmaǵynda ornalasqan órt sóndirý gıdrantynan alyndy. Órttiń neden shyqqanyn anyqtaý maqsatynda birden órt sóndirý zerthanasy jumysyn bastady. Nysan túnde jumys istemeıdi, dabylqaqqysh qosýly bolǵan. Sondyqtan órt qoıylǵan dep aıtýǵa erte. Mamandar jumys istep jatyr, beınekameralardaǵy jazbalardy qarap jatyrmyz», - dedi brıfıngte oblystyq tótenshe jaǵdaılar departamentiniń bastyǵy Ramıl Kamalov.
Órt saldarynan 1 qabattaǵy azyq-túlik, turmystyq hımııa, uıaly telefon satatyn 3 býtık órtenip ketti, taǵy úsheýi zaqymdandy. 2 qabatta 1 býtık búlingen. Órt aýmaǵy 450 sharshy metrdi qurady. Órt tolyǵymen tańǵy saǵat 6.00-de sóndirildi. Qaza tapqandar men zardap shekkender joq.
Órttiń shyǵý sebebi men kelgen shyǵyn mólsheri anyqtalyp jatyr.
