Petropavlda saýda ortalyǵyn «jarmaq bolǵan» er adam tutqyndaldy
ASTANA. QazAqparat - SQO polıtseıleri terrorızm jóninde jalǵan habarlama taratty degen kúdikpen Petropavl qalasynyń turǵynyn ustady, dep habarlaıdy QazAqparat tilshisi SQO ІІD baspasóz qyzmetine silteme jasap.
Vedomstvodan habarlaǵandaı, 31 mamyr kúni «City mall» saýda ortalyǵynda jarylys bolatyny týraly habarlama kelip túsken. Osyǵan baılanysty oblystyń quqyq qorǵaý organdary arnaıy sharalardy júzege asyryp, saýda ortalyǵy men oǵan qarasty aýmaqty tolyq tekserip shyqqan. «City mall» saýda ortalyǵymen birge, «Korona» ortalyǵynan adamdar syrtqa shyǵarylyp, aýmaq qorshaýǵa alynǵan.
«Jedel-izdestirý sharalary barysynda terrorızm jóninde jalǵan habarlama taratty degen kúdikpen Petropavl qalasynyń 1986 jyly týǵan turǵyny ustalyp, ýaqytsha oqshaýlaǵyshqa qamaldy. Oǵan qatysty «qamaqqa alý» sharasy qoldanyldy. Aıyby dáleldengen jaǵdaıda ol 6 jylǵa deıin bas bostandyǵynan aıyrylýy múmkin», - delingen habarlamada.
