Petropavlda satýshysy joq dúken ashyldy
Qaıyrymdylyq dúkeninen qıyn jaǵdaıǵa tap bolǵan nemese turmysy tómen otbasylar ózine kerektiń bárin tegin ala alady. Bul jerde kıim-keshek qana emes, turmysqa qajetti zattar da bar.
Áleýmettik jobanyń avtory – Petropavl turǵyny, kásipker Petr Vagner. Osyndaı bastamany qolǵa alý onyń kópten oıynda júr eken.
«2008 jyly ǵıbadathana saldym. Keıin adamdar paıdalanýǵa bolatyn, alaıda úıinde jaı jatqan zattaryn osynda ákele bastady. Onyń ishinde balalaryna syımaı qalǵan kıim-keshek te, kúndelikti turmysqa qajet zattar da boldy. Sol kezde osyndaı qaıyrymdylyq býtıgin ashý týraly oı keldi. Sol oıym endi júzege asyp jatyr», - deıdi Petr Vagner.
Bul qaıyrymdylyq dúkeniniń basqalardan ereksheligi – munda ne satýshy, ne jaýapty adam joq. Óńir turǵyndary qaıyrymdylyq jasaǵylary kelse, dúnıesin ákelip, qoıyp ketedi.
«Taýardy qabyldap, suryptaıtyn adam joq. Sol sebepti zattaryn ákelgen adam ony uqyptap búktep, ne ilip ketse degen tilegim bar. Muqtaj jandar ózderine kerekterin alady. Qansha, nesheýin alamyz dese de olarǵa eshkim toqtaý salmaıdy», - deıdi kásipker.
Qaıyrymdylyq dúkeni Petropavldaǵy «Strana tovarov» saýda úıiniń ekinshi qabatynda ornalasqan.
