Petropavlda salynyp jatqan sport saraıy 2 mlrd. teńgege túsedi (FOTO)
PETROPAVL. QazAqparat - Petropavlda salynyp jatqan jańa zamanaýı sport saraıynyń qurylysyna 2 mlrd. teńgeden astam qarjy jumsalady. Onda muz aıdyny, jeńil atletıka maneji jáne sport zaldary ornalasady.
Qazirgi kezde qurylysshylar metall qurastyrmalaryn ornatýda. Nysanda 60 adam - basqa óńirlerde muz aıdyny qurylysymen aınalysqan elordalyq «Vılena» kompanııasynyń qyzmetkerleri eńbek etýde.
Nysandy tolyq kúıinde tapsyrý josparlanýda, qurylysshylar ǵımaratty salýmen qatar, onyń ishin de jaılastyrady, muz jasaý úshin qajetti tehnıkany satyp alady.
«Bıylǵy jyl 1 mlrd. teńgeden astam qarjyny ıgermekpiz. Bizdermen Máskeýden jetkizýshi jumys jasaýda. Qarashanyń ortasyna deıin biz barlyq metall qurastyrmalaryn ornatamyz jáne ony paneldermen jáne vıtrajdarmen jabýdy bastaımyz». - dedi «Vılena» JShS ýchaskesiniń bastyǵy Azamat Anafın.
Muz aıdynynyń aýdany 2600 sharshy metr bolmaqshy. Onda halyqaralyq deńgeıdegi hokkeı jarystaryn uıymdastyrýǵa bolady. Ekiqabatty ǵımarattyń jalpy aýdany 11 myń sharshy metrden asady. «Muz aıdyny arenasynda myń otyratyn oryn, jeńil atletıka maneji, jekpe-jek kúresi, boks, kúres jáne jattyǵý zaldary, gımnastıka zaly kózdelgen. Ony iske qosqannan keıin bizde ázirshe kóp damymaǵan short-trek, mánerlep syrǵanaý, hokkeı sııaqty sport túrlerine arnalǵan oryndar ashamyz», - dedi SQO dene shynyqtyrý jáne sport basqarmasy bastyǵynyń orynbasary Azat Omarov.
Soltústikqazaqstandyqtar kelesi jyldyń ózinde jabyq muz aıdynyn baıqap kóretin bolady. Merdigerler nysandy 2015 jylǵy tamyzda isqe qosýdy josparlap otyr.
