Petropavlda salynyp jatqan kópsalaly aýrýhana «saqaldy qurylysqa» aınalmaıdy
Soltústik Qazaqstan oblysynyń ákimi Qumar Aqsaqalov Petropavldaǵy qurylys nysandaryn aralap, ondaǵy máselelerdiń qalaı sheshimin taýyp jatqanyn tilshilerge aıtyp berdi. Sondaı qurylystardyń biri – oblys ortalyǵynda salyna bastaǵan kópsalaly aýrýhana. Túrik ınvestorlary 2019 jyly áleýmettik nysannyń qurylysyn bastaǵan edi. Bıylǵy jyldyń aıaǵynda tapsyrylýy tıis bolǵan aýrýhana qurylysy belgisiz merzimge toqtatylǵan.
«Densaýlyq saqtaý mınıstrligi qazir memlekettik-jekeshelik áriptestik tetigin jetildirip jatyr. Sondyqtan bul nysan «saqaldy qurylysqa» aınalady dep qorqýdyń qajeti joq. Biz ony mindetti túrde salyp, paıdalanýǵa beremiz. Mınıstr barlyq jospardyń iske asyrylatynyn taǵy da rastady. Sondyqtan bul nysan salynbaı qalady dep qorqýdyń qajeti joq. Petropavl, Túrkistan jáne Nur-Sultan qalalarynda salyna bastaǵan úsh aýrýhana qurylysy da aıaqtalady. Kúzge qaraı qurylys qaıta bastalady dep úmittenemiz», - dedi SQO ákimi.
Budan basqa «Bereke» jáne «Jas Órken» shaǵyn aýdandaryndaǵy emhanalardy paıdalanýǵa berý merzimderi de keshiktirilip jatyr. «Jas Órken» yqsham aýdanyndaǵy emhananyń qurylysyn «Alfa Sever» JShS ótken jyldyń qarasha aıynda bastaǵan. Joba quny – 2 mlrd teńgeden asady. Qazir emdeý mekemesiniń qabyrǵasy kóterilgen, montajdaý jumystary júrgizilip jatyr. Jyl sońynda tapsyrylýy tıis nysanda osy ýaqytqa deıin jumystyń 30 % ǵana atqarylǵan. Kompanııa dırektory Andreı Kapýstınniń aıtýynsha, eski úılerdi buzyp, qurylys alańyn daıyndaýda biraz qıynshylyq bolǵan. Sondyqtan jumys belgilengen merzimnen kesh bastaldy.
Óńir basshysynyń sózinshe, «Jas Órken», «Bereke» emhanasy da salynyp, paıdalanýǵa beriledi. Merdigermen másele bar. Biraq ol sot arqyly sheshimin tappaq.
Buǵan deıin SQO ákimi Petropavldaǵy jylý-elektr ortalyǵynda jartylaı qulaǵan murjaǵa qatysty jumystar týraly aıtqan edi.