Petropavlda salyq organy kóz jumǵan qyzmetkeriniń jesirine 34 mln teńge tóleıdi

PETROPAVL. KAZINFORM – Petropavl qalalyq soty memlekettik organdy ótemaqy tóleýge mindettedi.

Soltústik Qazaqstan oblystyq sotynyń málimetinshe, salyq organynyń qyzmetkeri qyzmettik mindetin atqarý kezinde mert bolǵan. Qaıǵyly jaǵdaıdan keıin marqumnyń jubaıy, kámeletke tolmaǵan úsh balany jalǵyz ózi tárbıelep otyrǵan ana, memlekettik organǵa birjolǵy járdemaqy tóleý týraly ótinishpen júgingen.

Alaıda oǵan «qarjylandyrý joq jáne basqa ınstantsııalarmen kelisý qajet» dep tóleýden bas tartylǵan.

Osyǵan baılanysty áıel sotqa talap aryz berip, 58 mln teńgeden astam somada ótemaqy tóleýdi surady. Bul soma marqum jubaıynyń sońǵy 12 aıdaǵy tabysy negizinde eseptelgen.

Bul is Petropavl qalasynyń №2 sotynda qaraldy.

Sot isti qaraý barysynda Qazaqstan Respýblıkasynyń «Salyqtar jáne bıýdjetke tólenetin basqa da mindetti tólemder týraly» Zańyna súıendi. Onda:

«Eger salyq organdarynyń laýazymdy tulǵasy qyzmettik mindetin atqarý kezinde qaza tapqan jaǵdaıda, onyń otbasyna nemese asyraýyndaǵy adamdarǵa sońǵy atqarǵan laýazymy boıynsha on jyldyq aqshalaı qamtylym mólsherinde birjolǵy járdemaqy tólenedi», — delingen.

Bul tólem respýblıkalyq bıýdjet qarajaty esebinen júzege asyrylady.

Marqumnyń arnaıy sheni nemese ataǵy bolmaǵandyqtan, sot bul jaǵdaıda jalaqyny negizge aldy.

Nátıjesinde talap aryz ishinara qanaǵattandyrylyp, memlekettik organdy marqumnyń jubaıyna qyzmetkerdiń on jyldyq laýazymdyq jalaqysy negizinde eseptelgen 34,8 mln teńgeden astam somany tóleýge mindettedi.

Sot sheshimi zańdy kúshine endi.

Buǵan deıin SQO-da sottalǵandar kásipkerlik negizin meńgerip, qarjylyq saýatyn arttyratyndyǵyn jazǵan edik.