Petropavlda «Sal-serilerdiń serkesi» atty aqyndar aıtysy márege jetti
ORAL. QazAqparat - Petropavl qalasynda Segiz seri (Muhamedqanapııa) Bahramuly Shaqshaqovtyń 200 jyldyǵyna arnalǵan «Sal-serilerdiń serkesi» atty respýblıkalyq aqyndar aıtysy márege jetti, dep habarlaıdy «QazAqparat» tilshisi.
Aıtys ónerin damytý, aqyndardyń sheberligin shyńdaı túsý maqsatynda uıymdastyrylǵan aıtýly dodaǵa barlyǵy 16 aqyn qatysyp, baq synady.
Qazylar alqasynyń sheshimimen saıys qorytyndysynda bas júldeni (Renault Duster avtomobıli) belgili aıtysker aqyn, almatylyq Rınat Zaıytov jeńip aldy. Qaraǵandylyq Maqsat Aqanov birinshi júldeni (1 mln teńge) qanjyǵasyna baılasa, batysqazaqstandyq Jansaıa Mýsına men soltústikqazaqstandyq Jarqyn Juparhan ekinshi orynǵa (500 myń teńgeden) kóterildi. Sondaı-aq semeılik Ásem Ereje, almatylyq Qaziret Berdihan, Bolatbek Orazbaev (Almaty oblysy) úshinshi orynǵa (300 myń teńgeden) ıe boldy.
«Aıtys joǵary deńgeıde ótti. Men soltústikqazaqstandyq Jarqyn Juparhanmen sahnaǵa shyqtym. Eń bastysy, aqyndar ónerine kórermender qoshemeti erekshe boldy», dedi «QazAqparat» tilshisine Jansaıa Mýsına.
