Petropavlda ruqsatsyz satylǵan pırotehnıkalyq buıymdar tárkilendi

PETROPAVL. KAZINFORM – Petropavlda «Pırotehnıka» respýblıkalyq jedel-profılaktıkalyq is-sharasy aıasynda saýda oryndary tekserilip jatyr.

Petropavlda ruqsatsyz satylǵan pırotehnıkalyq buıymdar tárkilendi
Foto: SQO Polıtsııa departamenti

Soltústik Qazaqstan oblystyq polıtsııa departamenti baspasóz qyzmetiniń málimetinshe, Petropavldaǵy Jumysshy kentinde ornalasqan dúkende reıd barysynda polıtseıler sertıfıkaty joq 41 qorap pırotehnıkalyq buıym tárkiledi. Dúken ıesinde mundaı ónimdi satýǵa ruqsat ta, taýar sapasyn rastaıtyn sertıfıkat ta bolmaǵan. Ol ákimshilik jaýapkershilikke tartyldy.

Bul saýda orny tártip saqshylarynyń nazaryna alǵash ret iligip otyrǵan joq. 10 qarashada dál osy dúkennen zańsyz satylymǵa qoıylǵan taǵy 28 qorap pırotehnıkalyq buıym tárkilengen.

Zańsyz saýda derekteri oblystyń ózge aýdandarynda da tirkeldi. Esil jáne Aqqaıyń aýdandarynda anyqtalǵan eki quqyq buzýshylyq boıynsha taǵy 12 qorap pırotehnıkalyq buıym tárkilendi.

Petropavlda ruqsatsyz satylǵan pırotehnıkalyq buıymdar tárkilendi
Foto: SQO polıtsııa departamenti

Tártip saqshylary sertıfıkatsyz pırotehnıkalyq buıymdardyń kóbine tıisti talaptarǵa saı tasymaldanyp, saqtalmaıtynyn eskertedi. Mundaı ónimderdi paıdalaný kúıikke, jaraqat alýǵa jáne órtke ákep soǵýy múmkin. Polıtsııa pırotehnıkalyq buıymdardy tek mamandandyrylǵan dúkenderden satyp alyp, qaýipsizdik talaptaryn qatań saqtaýǵa shaqyrady.

Petropavlda ruqsatsyz satylǵan pırotehnıkalyq buıymdar tárkilendi
Foto: SQO Polıtsııa departamenti

«Pırotehnıka» jedel-profılaktıkalyq is-sharasynyń birinshi kezeńi 10-30 qarasha aralyǵynda ótkiziledi. Ekinshi kezeńi jańa jyldyq merekeler qarsańynda, 29 jeltoqsannan 3 qańtarǵa deıin jalǵasady.

Buǵan deıin Temirtaýda zańsyz saýda ornynan 300 lıtrden astam alkogol tárkilengenin jazǵan edik.

Petropavlda ruqsatsyz satylǵan pırotehnıkalyq buıymdar tárkilendi
Foto: SQO Polıtsııa departamenti