Petropavlda ruqsat qujattary joq alkogol jáne temeki ónimderi tárkilendi

PETROPAVL. QazAqparat – Petropavldaǵy qoımalardyń birinen lıtsenzııasy joq, shyqqan jeri belgisiz 520 lıtr spırttik ishimdik jáne 259 blok temeki ónimi tabyldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, ruqsat qujattary joq ónimdi Petropavl polıtseıleri qalanyń Bostandyq kóshesindegi qoımalardyń birinen tapqan. Lıtsenzııalanbaǵan spırt qosylǵan suıyqtyq plastık bótelkelerde saqtalǵan. Sondaı-aq shyqqan jeri belgisiz aktsızdik markasy joq temeki ónimi de anyqtaldy. Tekserý barysynda taýar oblys ortalyǵynyń 36 jastaǵy turǵynyna tıesili bolyp shyqty. Nátıjesinde 520 lıtr alkogol bar suıyqtyq, sondaı-aq 259 blok temeki tárkilendi. Saraptama taǵaıyndaldy.

Jergilikti polıtsııa qyzmeti bóliminiń bastyǵy Rýstam Sadýlovtyń aıtýynsha, quramynda spırt bar ónimderdi, sondaı-aq aktsızdik markalary joq temeki ónimderin satý jáne saqtaý faktisi boıynsha taýar ıesine qatysty ákimshilik materıal jınaldy. Baptyń sanktsııasymen jeke tulǵalarǵa qatysty 15 AEK mólsherinde ákimshilik aıyppul kózdelgen. Jyl basynan bul SQO polıtseıleri tárkilegen lıtsenzııalanbaǵan alkogoldiń eń iri partııasy.