Petropavlda ruqsat etilmegen jerde saýda jasaýshylardy jazalap jatyr
PETROPAVL. QazAqparat - Petropavlda belgilenbegen jerde saýda jasaýdyń 495 deregi tirkeldi, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń habarlaýynsha, tártip saqshylary ruqsat etilmegen jerde saýda-sattyqpen aınalysýshylardy jıi anyqtaıdy.
«Ádette biz talapty buzǵandardy eskertemiz. Óıtkeni negizgi jumysymyz aldyn alýǵa baǵyttalǵan. Qyzmetkerlerimiz turǵyndarǵa óz ónimderin tek arnaıy bólingen jerlerde ǵana satýǵa bolatynyn túsindiredi», - deıdi qalalyq Polıtsııa basqarmasy bastyǵynyń orynbasary Nurjan Qojaǵulov.
Sońǵy eki kúnde polıtseıler Petropavlda retsiz saýda jasaýdyń 6 faktisin anyqtady. Buǵan deıin birneshe ret eskertilgendikten, olardyń barlyǵyna aıyppul salyndy.
Tártip saqshylarynyń aıtýynsha, Pýshkın jáne Bóketov kósheleriniń qıylysynda jemis-jıdek satyp turǵan oblys ortalyǵynyń 20 jáne 23 jastaǵy eki turǵyny buǵan deıin de QR Ákimshilik kodeksiniń «Belgilenbegen oryndarda saýda jasaý» 204-baby boıynsha jazaǵa tartylǵan eken.
Saýda jasaýǵa bolatyn jerlerdi jergilikti ákimdikter belgileıdi. Petropavl qalasynda osyndaı 10 oryn bar.
Polıtseılerdiń aıtýynsha, túsindirý jumystary óz nátıjelerin berýde. Ótken jylmen salystyrǵanda QR ÁKBtK 204 baby boıynsha zańbuzýshylyqtar eki ese azaıǵan. Byltyr bes aıdyń ishinde 948 fakti tirkelse, bıyl osy aralyqta 495 derek anyqtalǵan. Oblys boıynsha da kórsetkish 1116-dan 661-ge deıin azaıǵan.
