Petropavlda «Rıng patshasy-2021» atty halyqaralyq dástúrli saıys ótti
Soltústik Qazaqstan oblysy dene shynyqtyrý jáne sport basqarmasy baspasóz qyzmetiniń málimetinshe, Petropavlda A.Vınokýrov Sport saraıynda ótken «Rıng patshasy-2021» týrnıri QR Konstıtýtsııasy kúnine jáne QR Táýelsizdiginiń 30 jyldyǵyna arnaldy.
Fınaldyq kezeńge Almaty, Nur-Sultan, Qaraǵandy, Temirtaý, Pavlodar, Petropavl, sondaı-aq Omby (Reseı Federatsııasy) jáne Bishkek (Qyrǵyzstan) qalalarynan 25 boksshy ótti.
Dástúr boıynsha «Rıng patshasynyń» aqtyq jekpe-jegi áserli ótti. KSRO-nyń eńbek sińirgen sport sheberi, 1983 jyly Álem Kýbogynyń kúmis júldegeri, 1983 jyly Eýropa chempıony, KSRO-nyń birneshe dúrkin chempıony, 61 jastaǵy Serik Nurqazov jáne qyrǵyz ultynyń boks ardageri, 57 jastaǵy Abdýlahat Týrdy-ogly qatysqan jekpe-jek kórermendi tánti etti. Serik Tókenuly burynǵy jyldary týrnırge qurmetti qonaq retinde qatysqan, al bıyl rıngke shyǵyp, boks jankúıerlerin qýantty. Abdýlahat Týrdy-ogly da jarystyń turaqty qatysýshysy. Eki boksshy da ózderiniń keremet daıyndyǵy men tehnıkasyn kórsete bildi.
63 kelige deıingi salmaq dárejesinde QR sport sheberi, QR 2005 jylǵy chempıony, stýdentter arasyndaǵy 2006 jylǵy álem chempıony, kókshetaýlyq Andreı Spırıdonovpen halyqaralyq dárejedegi sport sheberi, Qazaqstannyń úsh dúrkin chempıony, áskerı qyzmetshiler arasyndaǵy álem chempıony, Álem kýbogynyń júldegeri, Afınadaǵy Olımpıada oıyndarynyń qatysýshysy, Nur-Sultan qalasynan kelgen Mırjan Rahymjanov aqtyq jekpe-jekte kezdesip, jeńiske jetti. Qola medaldi Nur-Sultan qalasynan kelgen Halıolla Begenov jeńip aldy.
69 kelige deıingi salmaqta altyn medal men «Rıng patshasy – 2021» beldigin halyqaralyq dárejedegi sport sheberi, aqtyq saıysta soltústikqazaqstandyq Maqsat Ábilbosharovty jeńgen reseılik Zınat Jandybaev ıelendi. «Qola» bul salmaqta Nur-Sultan qalasynan kelgen Jeńis Nurǵojınge buıyrdy. Taǵy bir astanalyq boksshy Nurlan Musabaev 75 kelige deıingi salmaq dárejesinde «qola» jeńip aldy, al osy salmaqtaǵy «rıng patshasy» bolyp, týrnır tarıhynda úshinshi ret jerlesi Vasılıı Kýlıkovty jeńip alǵan qaraǵandylyq Qýanysh Isembaev tanyldy.
Olardyń komandalasy Tımýr Baıserkeev 81 kelige deıingi salmaq dárejesinde týrnırdiń jeńimpazy atandy. «Kúmis» soltústikqazaqstandyq Asylbek Kokýshevte, al «qolany» almatylyq Erlan Ámirhanov aldy.
Aýyr salmaqtaǵy (91 keliden astam) eń tartysty jekpe-jekte almatylyq Aslan Táji jeńiske jetti. Ardagerler arasyndaǵy týrnırdiń birneshe márte qatysýshysy, qaraǵandylyq Vladımır Maltsev kúmis medalǵa ıe boldy. Pavlodarlyq Áskerbek Mustafın «qola» júldeni ıelendi.