Petropavlda iri mólsherde esirtki taratpaq boldy degen kúdikpen Astana turǵyny ustaldy
PETROPAVL. KAZINFORM — Astananyń 27 jastaǵy turǵyny Petropavl aýmaǵynda sıntetıkalyq esirtki taratý úshin arnaıy kelgen.
Taksımen jetken er adamdy óńir polıtseıleri jolda qolǵa túsirdi.
Soltústik Qazaqstan oblysy polıtsııa departamentiniń málimetinshe, kúdiktiniń rıýkzagynan taratýǵa daıyndalǵan úsh orama alynyp, tárkilendi. Taǵy bir orama astanalyq turǵynnyń qaltasynan tabyldy.
Saraptama olardyń quramynda sıntetıkalyq esirtki — α-PvP bar ekenin kórsetti. Tárkilengen zattyń jalpy salmaǵy — 230 gramm. Aldyn ala málimet boıynsha, er adam psıhotroptyq zattardy taratatyn ınternet-dúkende tasymaldaýshy jáne esirtki zattaryn jasyryn oryndarǵa ornalastyrýshy qyzmetin atqarǵan.
Onyń aıtýynsha, ınternet-dúkende jumys isteı bastaǵanyna shamamen eki apta bolǵan jáne bul onyń Petropavlǵa esirtkimen kelgen ekinshi sapary. Qazir osy fakti boıynsha tergeý júrgizilip jatyr.
Polıtseılerdiń aıtýynsha, jyl basynan beri SQO polıtseıleri zańsyz aınalymnan 462 esirtki zatyn tárkiledi. Onyń ishinde 8 kelisi — sıntetıkalyq esirtki.
Buǵan deıin Astanadan Petropavlǵa taratýǵa 120 túıinshek esirtki ákelgen kúdikti ustalǵanyn jazǵan edik.
