Petropavlda «Qyzyljar» arnaıy ekonomıkalyq aımaǵy keńeıtildi

PETROPAVL. KAZINFORM — Petropavlda jańa sheteldik kásiporyndy ashý maqsatynda «Qyzyljar» arnaıy ekonomıkalyq aımaǵy keńeıtilip, besinshi sýbaımaq paıda boldy. 

Soltústik Qazaqstan oblysy ákimdiginiń kásipkerlik jáne ındýstrııalyq-ınnovatsııalyq damý basqarmasynyń málimetinshe, jańa sýbaımaq 10 maýsym kúni Qazaqstan Respýblıkasy Úkimetiniń № 424 qaýlysymen quryldy. Osylaısha «Qyzyljar» arnaıy ekonomıkalyq aımaǵy 24,5 ga aýmaqqa ulǵaıyp, 236,8 ga jetti.

Jańa qurylǵan besinshi sýbaımaqta halyqaralyq deńgeıdegi iri ınvestıtsııalyq joba júzege asady.

— Jańa sýbaımaqta qurylysqa qajet aǵash ónimderin óndirýmen aınalysatyn kásiporyn qurylmaq. Osy maqsatqa 90 mlrd teńge ınvestıtsııa quıylmaq. Nátıjesinde 500 turaqty jumys orny ashylady. Qazirgi ýaqytta «Qyzyljar» arnaıy ekonomıkalyq aımaǵynyń qatysýshysy retinde tirkeý protsesi júrip jatyr.

Óńir úshin mundaı jobanyń iske qosylǵany tıimdi: jańa jumys oryndary ashylady, bıýdjetke salyq túsedi, joǵary tehnologııaly óndiris damıdy, sheteldik ınvestorlardyń senimi artady.

Investorlar úshin de birqatar jeńildik bar — arnaıy ekonomıkalyq aımaq qatysýshylaryna salyqtyq jáne kedendik jeńildikter usynylady. Bul óz kezeginde ınvestorlar úshin Qazaqstanda bıznes júrgizýdiń tıimdiligin arttyrady, — deıdi oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Darhan Ámrın.

2019 jyldan beri jumys istep kele jatqan «Qyzyljar» arnaıy ekonomıkalyq aımaǵynda búginde 21 kompanııa ornalasqan. Jalpy ınvestıtsııa kólemi 315,9 mlrd teńge. Nátıjesinde shamamen 4 myń jańa jumys orny ashyldy.

Buǵan deıin halyqaralyq valıýta qory Qazaqstan ekonomıkasynyń damý perspektıvalaryn baǵalaǵan edi.