Petropavlda Prezıdenttik saılaýǵa oraı arnaıy anyqtamalyq qyzmet jumysyn bastady

PETROPAVL. QazAqparat - Petropavl qalasynda kezekten tys Prezıdent saılaýy qarsańynda arnaıy anyqtamalyq qyzmet jumys isteı bastady, dep habarlaıdy QazAqparat tilshisi.

Call centr-ge habarlasyp, petropavldyqtar saılaýǵa qatysty tolyq aqparat ala alady. Sol úshin arnaıy 46-25-10 telefon nómiri bólingen. 23 sáýirden bastap jumys istep jatqan ortalyqqa qazir kúnine 10-15 adamnan habarlasýda. Turǵyndar negizinen ózderiniń saılaýshylar tiziminde bar-joqtyǵyn tekserip, qaı ýchaskede daýys beretindikterin biledi eken.

«Petropavl qalasy úlkeıip jatyr. Jańa úıler salynyp, jańa yqshamaýdandar paıda boldy. Budan basqa turǵyndar páterlerin ózgertip, mekenjaılaryn aýystyryp jatady. Qujattaryn ózgertkender de bar. Kóship kelip, ketip jatqandar, qaıtys bolǵan - osynyń bári eskerilip tizim jasaldy. Anyqtamalyq qyzmetke telefon soǵyp, qajetti aqparatty ala alady», - deıdi Petropavl qalalyq ákimdigi apparatynyń qyzmetkeri Rashıda Tileýbaeva.

Anyqtama qyzmeti saılaý kúnine deıin jumysyn toqtatpaıdy. Sonymen qatar ár turǵyn Petropavl qalalyq ákimdiginiń resmı saıtyna kirip, JSN-di engizý arqyly saılaýshylar tiziminen ózin izdeı alady.

Mamandardyń aıtýynsha, petropavldyqtar 9 maýsym kúni 93 saılaý ýchaskesinde daýys beretin bolady. Bıyl saılaý ýchaskeleriniń sany úshke artty.