Petropavlda poıyz kestesi jergilikti ýaqytpen belgilenetin boldy
PETROPAVLOV. QazAqparat - 1 tamyzdan bastap «Rossııskıe jeleznye dorogı» AAQ-nyń barlyq vokzaldarynda poıyzdyń kelý jáne ketý ýaqyttary jergilikti ýaqytpen kórsetiletin boldy. Bul jańalyq Petropavl temirjol vokzalyna da qatysty, dep habarlaıdy QazAqparat.
Jolaýshylarǵa kórsetiletin qyzmettiń sapasyn jaqsartýǵa baǵyttalǵan ózgertister jóninde «RJD» holdıngi (Reseı temir joldary-avt.) saıtynda jarııa etti.
«Endi poıyzdardyń kelý jáne ketý ýaqyttary jergilikti ýaqytpen elektrondy tabloda, platforma kórsetkishi men vokzal saǵattarynda kórsetilip, sondaı-aq daýys zoraıtqyshtar arqyly habarlanady. Buǵan deıin ol Máskeý ýaqytymen kórsetilip kelgen.
Bul ózgeris 2018 jyldyń 1 tamyzynan bastap kúshine enedi. Qazirgi ýaqytta «RJD» AAQ qoldanystaǵy aqparattyq júıeni ózgertý jóninde tehnıkalyq jumystardy júrgizýde», - delingen habarlamada.
Aqparatty Petropavl temirjol vokzaly da rastady.
Petropavl temirjol stansasy «RJD» AAQ-nyń Ońtústik Oral temirjol jelisine qaraıdy. Buǵan deıin stansa bergen bılette kelý jáne ketý ýaqyttary Máskeý ýaqytymen kórsetilip keldi.
Avtor: Olesıa Jýkoven
