Petropavlda polıtsııanyń ýchaskelik ınspektorlary tsıfrlyq tehnologııaǵa kóship jatyr
PETROPAVL. KAZINFORM – Petropavldyń ýchaskelik polıtsııa ınspektorlaryna qaǵaz jýrnaldar men túrli bazadan izdeletin aqparat qyzmettik planshet arqyly bir sátte qoljetimdi bolmaq.
Soltústik Qazaqstan oblysy polıtsııa departamentiniń málimetinshe, ýchaskelik polıtsııa ınspektorynyń jumys aýqymy keń. Bir ınspektor ózine bekitilgen aýmaqta turǵyndardyń ótinishterin qarap, profılaktıkalyq eseptegi azamattardy, qarý ıelerin, otbasylyq janjalqoılardy, shetel azamattaryn nazarda ustaýy qajet. Túrli tekserýler men esep júrgizýi tıis. Osynyń bárin qaǵazǵa túsirip, ártúrli jýrnaldar men tizimderdi jańartyp otyrý ınspektordyń birshama ýaqytyn alatyn.
Endi bir planshette qajetti aqparattyń barlyǵy bolmaq. Tsıfrlandyrý jáne jasandy ıntellekt jyly aıasynda Petropavldyń ýchaskelik polıtsııa ınspektorlarynyń qyzmettik planshetterine «Tsıfrlyq PÝI» júıesi men arnaıy mobıldi qosymsha ornatylyp jatyr. Derekter bazasy tolyq qalyptasqannan keıin ınspektor ózine bekitilgen aýmaqtaǵy qajetti aqparatty planshet arqyly izdeı alady. Azamatty aty-jóni, ákesiniń aty, JSN-i, jynysy nemese esep túri boıynsha tabýǵa múmkindik bar. Eń bastysy - aqparatty ýaqytynda jańartý da áldeqaıda jeńildeıdi.
Jańa júıede sondaı-aq, izdeýdegi adamdar boıynsha baǵdarlar, ýchaskelik polıtsııa pýnktteriniń tizimi, beınebaqylaý kameralaryna qoljetimdilik, aýmaq boıynsha statıstıka jáne kiriktirilgen taldaý quraldary qarastyrylǵan.
Petropavldyń 100-ge jýyq ınspektory jańa júıemen jumys isteýge arnalǵan praktıkalyq sabaqqa qatysty. Sabaq barysynda SQO Polıtsııa departamentiniń tsıfrlandyrý jáne jasandy ıntellekt basqarmasy qyzmetkerleri elordalyq IT-kompanııa mamandarymen birge júıeniń múmkindikterin tanystyrdy. Inspektorlarǵa «Tsıfrlyq PÝI» júıesin planshet arqyly kúndelikti qyzmette paıdalaný joldary kórsetildi.
Qazir mamandar derekter bazasyn qajetti aqparatpen tolyqtyrý jumystaryn júrgizip jatyr. Júıeni óńirde tolyq engizý jáne onyń múmkindikterin keńeıtý jumystary jaqyn ýaqytta aıaqtalady dep josparlanǵan.
Mamandardy aıtýynsha, ýchaskelik polıtsııa ınspektorlarynyń qyzmetin bekerden-beker «myń bir mindettiń jumysy» dep atamaıdy. Sondyqtan tsıfrlandyrýdyń negizgi máni - ınspektordyń ýaqytyn tıimdi paıdalaný. Bul polıtseılerdiń ýaqyty pen kúshin azamattarmen tikeleı jumys isteýge baǵyttaýǵa múmkindik beredi. Bul - qaýipsizdikti qamtamasyz etý jáne «Zań men tártip» qaǵıdatyn is júzinde júzege asyrý jolyndaǵy mańyzdy qadam.
Buǵan deıin «Qazsýshar» tsıfrlandyrý arqyly shyǵyndaryn azaıtqanyn jazǵan edik.
