Petropavlda polıtsııa formasyn kıgen áıel jazalandy

PETROPAVL. KAZINFORM – Petropavlda polıtsııa qyzmetkeriniń jıletin kıgen avtobýs kondýktory endi aıyppul tóleıdi.

Soltústik Qazaqstan oblystyq sotynyń málimetinshe, marshrýttyq avtobýstardyń birinde kondýktor ishki ister organdarynyń arnaıy formasyn, atap aıtqanda «Jol patrýldik polıtsııasy» jazýy bar jıletti kıip júrgen. 

Petropavl qalasynyń Ákimshilik quqyq buzýshylyqtar jónindegi mamandandyrylǵan soty isti qarap, B.-ny kináli dep tanydy. Áıelge 19660 teńge mólsherinde aıyppul saldy jáne polıtsııa formasyn - jıletti tárkiledi.

Qaýly birden zańdy kúshine endi. 

Buǵan deıin Petropavldaǵy jalǵyz jaǵajaıda demalýshylarǵa jaǵdaı jasalmaǵanyn jazǵan edik. Demalys ornynda ne dárithana, ne dýsh istemeıdi.