Petropavlda polıtsııanyń eki jańa modýldik beketi ashyldy
SQO Polıtsııa departamenti baspasóz qyzmetiniń málimetinshe, polıtsııanyń jańa modýldik pýnktteri Petropavlda Bylǵary zaýyty aýdanyndaǵy Ryjov kóshesinde jáne «Bereke» yqsham aýdanynda ashyldy. Bir bekettiń jalpy aýdany 20 sharshy metrden asady. Modýldik beket derbes kompıýtermen, statsıonarlyq telefonmen, syrtqy jáne ishki beınekameralar qosylǵan beınetirkegishpen jaraqtalǵan. Kameralar modýldegi monıtorlarǵa, sondaı-aq onlaın rejıminde Petropavl qalasy polıtsııa basqarmasynyń jedel basqarý ortalyǵyna jalǵanǵan.
Qala ákimi Bolat Jumabekovtiń aıtýynsha, bul sharalar quqyqtyq tártipti nyǵaıtýǵa septigin tıgizbek. Polıtsııa qyzmetkerleri zamanaýı beketterde táýlik boıy qyzmet atqarady. Modýldik pýnktter turǵyndardyń pikiri eskerile otyra osy yqshamaýdandarda ashyldy.
«Zamanaýı jabdyqtar men modýldik úlgidegi beketterdiń konstrýktsııasy polıtsııa qyzmetkerleriniń jumysyn ashyq jáne mobıldi etýge múmkindik beredi. Basty mindet – azamattardyń ótinishterine ýaqtyly den qoıýdy qamtamasyz etý», - deıdi modýldik bekettiń saltanatty ashylýynda bolǵan SQO PD bastyǵy Marat Tólebaev.
Jumystyń bul formaty óz tıimdiligin kórsetti. Buryn mundaı beketter Petropavldaǵy Áýezov jáne Ýálıhanov kóshelerinde, sondaı-aq aýdan ortalyǵy Taıynshada ashyldy. Bul modýlderdiń kezekshi qyzmetkerlerine azamattardan quqyqtyq tártipten bólek, túrli máseleler boıynsha ótinishter kelip túsedi. Olarǵa aıyna shamamen 200-ge tarta adam júginedi. Jýyrda oblys ortalyǵynda taǵy osyndaı zamanaýı eki statsıonarlyq beketti ashý josparlanyp otyr.
