Petropavlda polıtsııa birneshe ret urlyq jasaǵan adamdy áleýmettik jeli arqyly tapty
ASTANA. QazAqparat - Áleýmettik jeli arqyly qaladaǵy keńsege jáne býtıkke urlyqqa túsken belgisiz er adam týraly beınerolık taraǵan. Polıtsııa qyzmetkerleri jedel izdestirý nátıjesinde baýkespeni qolǵa túsirdi», - dep habarlaıdy QazAqparat SQO Polıtsııa departamentine silteme jasap.
«Keıipkerdiń urlyq jasaý sátinen alǵashqy beınerolık Instagram áleýmettik jelisinde paıda boldy. Beınejazbada qaladaǵy keńseniń birinen belgisiz er adamnyń foıedegi kúrekti urlap jatqan sáti kórsetilgen. Keńse ákimshiligi turǵyndardan qar tazalaýǵa arnalǵan kúrekti urlap ketken adamdy anyqtaýǵa áleýmettik jeli arqyly kómek kórsetýdi surady. Kelesi kúni áleýmettik jelide saýda býtıkteriniń birinen dál sol er adamnyń ámııandy urlap jatqan beınesi paıda boldy. Qalalyq tártip saqshylary kúdiktini birden ustady», - dep habarlaıdy SQO Polıtsııa departamentiniń baspasóz qyzmeti.
Habarlamada aıtylǵandaı, ustalǵan 48 jastaǵy qala turǵynynyń burynda isti bolǵany anyqtaldy. Sondaı-aq, tergeý barysynda onyń birqatar basqa da urlyqtarǵa qatysy bary belgili boldy.
«Ustalǵan azamat óz kinásin tolyǵymen moıyndady. Ol áleýmettik jelide taraǵan ózi týraly beınejazbanyń paıda bolǵanyn tanystarynan estipti. Bir qyzyǵy, kúrekti basqa bir keńseniń aldyn qardan tazartý úshin alǵan. Kúrekti paıdalanyp bolǵan soń, ony bazarǵa aparyp satyp jibergen. Ustalǵan azamattyń aıtýynsha, ol aldymen qaraýsyz qalǵan velosıped, shana men qolarbany urlaǵan. Sonymen qatar, satýshy men kúzetshisi oryndarynda joq býtıkterdi tonaǵan», - delingen habarlamada.
Atalǵan fakti QR QK 188-baby, 2-bóligi «Urlyq» boıynsha sotqa deıingi tergep-tekserýdiń biryńǵaı tizilimine engizildi.
