Petropavlda polıtseıler úrlemeli matraspen kóshelerde syrǵanaǵandardy jazalaıdy
PETROPAVL. QazAqparat – Petropavlda bir top jas jigit úrlemeli matrasty kóliktiń artyna tirkep, qala kóshelerimen syrǵanaǵan. Osylaısha, jurttyń nazaryn aýdarǵan jastardy tártip saqshylary ákimshilik jaýapkershilikke tartty, dep habarlaıdy QazAqparat tilshisi.
7 qańtar kúni áleýmettik jelide bir top jastyń úrlemeli matrasty kólikke tirkep, Petropavldyń ortalyq kóshelerinen ótkendigi jaıly rolık jarııalandy. Beınejazbadaǵy jastardyń beıádep qylyǵy kópshiliktiń talqysyna tústi. Ekinshi kúni Petropavldyń tártip saqshylary rolık keıipkerlerin anyqtady.
SQO Polıtsııa departamenti baspasóz qyzmetiniń habarlaýynsha, jergilikti polıtsııa qyzmeti bóliminiń qyzmetkerleri beınejazbadaǵy jastardy anyqtap, Polıtsııa basqarmasyna jetkizdi. 19-20 jastaǵy jigitter esh jerde jumys istemeıdi. Aralaryndaǵy bireýi jaqynda Reseıden kelgen eken. Matrasty súıregen avtokólik júrgizýshisi de belgili boldy. 1987 jyly týǵan petropavldyq bul iske oılanbaı barǵanyn aıtyp, endi opyq jep otyr.
«Jastar ózderinshe áleýmettik jeli qoldanýshylarynyń kóńilin kótermek bolǵan. Bul isteriniń adam ómirine qaýipti ekenin kesh túsinipti. «Usaq buzaqylyq» jáne «jolaýshylardy, júkti tasymaldaý barysynda erejeni saqtamaý jáne Jol qozǵalysy erejesin óreskel buzý» baptary boıynsha eki ákimshilik is qozǵaldy. Qazir materıaldar jınalyp, sotqa jiberildi», - deıdi Petropavl qalalyq polıtsııa basqarmasy jergilikti polıtsııa qyzmeti bóliminiń basshysy Álibek Ǵabdýllın.
Tártip saqshylary tanymal qalalyq pablıkter men qaýymdastyqtardyń ákimgerlerin kez kelgen rolıkti jarııalaı bermeýdi suraıdy. Óıtkeni áleýmettik jelide túrli jastaǵy adamdar otyrady. Úrlemeli matraspen syrǵanaǵandardyń isi jasóspirimderge úlgi bolýy múmkin. Bárin uıymdastyryp júrgen Kırıll men Tımýr óz ázilderi úshin kamera aldynda keshirim surap, basqalardy olardyń isin qaıtalamaýdy ótindi.
Byltyr SQO-nyń joldarynda 30 adam mert boldy. Kórsetkish ótken jyldarmen salystyrǵanda azaıǵan. Desek te polıtseıler «saqtansań, saqtaıdy» ustanymyn esten shyǵarmaýǵa shaqyrady.
