Petropavlda polıtseıler otbasynyń shyrqyn buzatyndardy tekserip jatyr
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda qorǵaý uıǵarymy shyǵarylǵan 82 adam, minez-qulqyna sot erekshe talaptar belgilegen 56 quqyq buzýshy, qolaısyz 130 otbasy, 326 nashaqor jáne 1 066 maskúnem esepte tur. Bul azamattardy saqshylar «Januıadaǵy zorlyq-zombylyqqa jol joq» aktsııasy aıasynda tekseredi.
«Áıelder polıtsııaǵa qońyraý shalyp, araq iship shańyraqtyń shyrqyn alǵan kúıeýin «bir jerge alyp ketýdi» suraıdy. Alaıda ýchaskelik ınspektorǵa qandaı da bir shara qoldaný úshin zańdy negiz qajet. Osy oraıda ýaqytsha ustalǵandardy kameraǵa ornalastyrý úshin ótinish talap etiledi. Sonyń negizinde ýchaskelik ınspektor ákimshilik sotqa materıal daıyndaıdy. QR Ákimshilik quqyq buzýshylyq týraly kodeksiniń 73-baby «Otbasy-turmystyq qatynastar aıasyndaǵy quqyqqa qarsy áreketter» babynda otbasylyq janjalqoılarǵa eskertý nemese 5 táýlikke deıingi merzimge qamaýǵa alý túrinde jaza qarastyrylǵan», - deıdi Petropavl qalasy polıtsııa basqarmasy bastyǵynyń birinshi orynbasary Álibek Ǵabdýllın.
Alaıda otbaylyq zorlyq-zombylyqtyń qurbandary kóp jaǵdaıda ótinish jazýdan bas tartady nemese olardy keri qaıtaryp alady.
«Eske sala keteıik: adamǵa dene jaraqattary keltirilgen jaǵdaıda sot-medıtsınalyq saraptamanyń nátıjesi kerek. Tek sodan keıin ǵana qylmystyq qýdalaý júrgizilýi múmkin. Kóbinese soqqyǵa jyǵylǵan áıelder saraptamadan jıi bas tartady. Aktsııanyń negizgi mindetteriniń biri – azamattardyń quqyqtyq saýattylyǵyn arttyrý, zańda kózdelgen qorǵaý tetikterin túsindirý jáne quqyq buzýshylyqtar úshin jaýapkershilikti eske salý», - deıdi Álibek Ǵabdýllın.
Jalpy aktsııanyń 3 kúni ishinde esepte turǵan 359 adam tekserilgen. 21 maýsymda bastalǵan «Otbasyndaǵy zorlyq-zombylyqqa jol joq» aktsııasy aıdyń sońyna deıin jalǵaspaq.