Petropavlda polıtseıler abattandyrý tártibin buzǵandardy anyqtap jatyr
PETROPAVL. QazAqparat - Petropavl qalasynda 3 aıdyń ishinde abbattandyrý qaǵıdalaryn buzýdyń 748 deregi tirkeldi. Tártip saqshylary 28 jaǵdaıda ǵana aıyppul salyp, qalǵandarynda eskertý jasaǵan, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń habarlaýynsha, tártip saqshylary abattandyrý erejelerin buzǵandardy anyqtaý maqsatynda reıdterdi kúsheıtti. Polıtseıler zańdy buzǵandardy, ázirshe eskertip jatyr. Eskertýdi elemegenderge aıyppul salynady.
«2019 jyly 748 ákimshilik quqyq buzýshylyq anyqtaldy. Olardyń 28-i boıynsha aıyppul salynsa, qalǵan 720-na eskertý jasaldy. Atalǵan quqyq buzýshylyqtar úshin QR Ákimshilik quqyq buzýshylyq týraly Kodeksiniń 505-babymen eskertý nemese aıyppul qarastyrylǵan. Jeke tulǵalarǵa - 20, shaǵyn kásipkerlik sýbektilerine nemese kommertsııalyq emes uıymdarǵa - 30, orta kásipkerlik sýbektilerine - 40, iri kásipkerlik sýbektilerine 100 AEK mólsherinde aıyppul salynady», - deıdi Petropavl qalalyq PD jergilikti polıtsııa qyzmeti bóliminiń ýchaskelik polıtsııa ınspektory Rýslan Shákirov.
Jyl saıyn kóktem kelisimen qoqys shyǵarý ózekti máselelerdiń birine aınalady. Qurylys pen turmystyq qaldyqtar, kúl úıindilerin turǵyndar der kezinde shyǵarýy úshin ýchaskelik polıtsııa ınspektorlary aýlalyq tekseris júrgizedi. Petropavl qalasynda jyl basynan abattandyrý erejelerin buzýdyń 748 faktisi anyqtalǵan. Quqyq buzýshylardyń basym bóligine bul joly eskertý jasaldy.
