Petropavlda polıtseı sýǵa batyp bara jatqan eki adamdy qutqaryp qaldy
PETROPAVL. QazAqparat – Petropavlda tártip saqshysy Esil ózeninde sýǵa batyp bara jatqan eki adamdy qutqardy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, mamyr aıynyń sońynda birinshi polıtsııa bólimi kezekshisiniń kómekshisi Meıirman Tólebaev jumystan bos ýaqytta Esil ózeni jaqta demalyp júrgen. Bir kezde adamdardyń kómekke shaqyrǵan daýsyn estıdi. Oqıǵa ornyna jetken aǵa serjant jaǵadan 20 metrdeı jerde adamdar sýǵa batyp bara jatqanyn baıqaıdy. Ol aldymen jas qyzdy, odan soń es-tússiz er adamdy alyp shyqqan, jaǵaǵa jaqyndaı bergende oǵan tanys qyz kómektesken. Meıirman er adamǵa jasandy demalý jáne júregine massaj jasaǵan.
Alǵashqy medıtsınalyq kómek kórsetkennen keıin jaǵdaı birshama jaqsardy.
«Meniń ulymnyń jaǵdaıy óte aýyr boldy. Dárigerler aýyr halde jansaqtaý bólimine jetkizdi. Polıtseı kómektespegende balamnan aıyrylar edim», - deıdi zardap shekken er
adamnyń anasy Galına Qarymsaqova.
«Jaǵa tereń jar, laıly jer, aıaqpen tirelýge qıyn boldy. Men kóp oılanbaı, sýǵa sekirdim», - deıdi Meıirman.
Sýǵa bata jazdaǵan soltústikqazaqstandyqtyń týystary oblystyq polıtsııa basshylyǵynyń atyna alǵys bildirip habarlasty.
Petropavl qalalyq polıtsııa basqarmasy birinshi polıtsııa bólimi kezekshisiniń kómekshisi Meıirman Tólebaev ishki ister organdarynda 5 jylǵa jýyq qyzmet etedi. 24 jastaǵy polıtseıdiń batyl áreketi áriptesterine úlgi.
