Petropavlda pırotehnıkalyq buıymdardy kóshede satqandar jazalanyp jatyr
PETROPAVL. QazAqparat – Petropavlda pırotehnıkalyq buıymdardy ruqsatsyz satqan eki adam ákimshilik jaýapkershilikke tartyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jańa jyl merekesi qarsańynda oblysta «Pırotehnıka» jedel-profılaktıkalyq is-sharasy ótip jatyr. Maqsat - pırotehnıkalyq buıymdardyń zańsyz saýdasynyń jolyn kesý.
Tártip saqshylarynyń aıtýynsha, elimizde pırotehnıkalyq buıymdardy erkin satýǵa tyıym salynǵan. Ol shektelgen taýarlar qataryna jatady. Sertıfıkattalmaǵan buıymdar qaýipti bolýy múmkin. Budan bólek, bul taýardy saqtaýdyń belgili bir talaptary bar. Olar kóbinese zańsyz satylym kezinde saqtalmaıdy. Saldarynan otshashý durys atpaı, oqys oqıǵa aparyp soǵýy múmkin.
«15 jeltoqsannan bastap Petropavldaǵy bazarlar men dúkenderde 6 tekseris júrgizildi. Saýda oryndarynyń qasynda, kóshede otshashý satqan eki qala turǵyny ákimshilik jaýapkershilikke tartyldy. Osy eki derek boıynsha «Taýarlarmen nemese ózge de zattarmen zańsyz saýda jasaý» baby boıynsha materıal jınaldy», - deıdi Petropavl qalalyq polıtsııa basqarmasy quramyndaǵy azamattyq jáne qyzmettik qarý aınalymyn baqylaý bóliminiń bastyǵy Meıram Sharyshev.
«Pırotehnıka» jedel-profılaktıkalyq is-sharasy SQO-da eki kezeńde ótedi, alǵashqysy 15-24 jeltoqsan aralyǵynda, ekinshi kezeńi 26 jeltoqsan men 7 qańtar aralyǵynda ótpek.
